भाजी उत्पादक शेतकारांचे संख्येंत वाड

भांगरभूंय | प्रतिनिधी

फलोत्पादन म्हामंडळाक 276 टन थळावी भाजी मेळ्ळी चड

नव्या 144 शेतकारांनी भाजी उत्पादन केलें सुरू

पणजी: गोंयांतल्या भाजी उत्पादक शेतकारांचे संख्येंत वाड जायत आशिल्ल्यान उत्पादनांत लेगीत वाड जाल्या. 2020-21 चे तुळेन 2022-23 त फलोत्पादन म्हामंडळाक 276 टन चड थळावी भाजी मेळ्ळी. जाल्यार नव्या 144 शेतकारांनी भाजी उत्पादन सुरू केल्ल्याची म्हायती म्हामंडळाचे वेवस्थापकी संचालक चंद्रहास देसाय हांणी ‘भांगरभूंय’ कडेन उलयतना दिली.

2020-21 त गोंयांतल्या 1,200 शेतकार भाजीचें उत्पादन घेताले. तांचे कडल्यान म्हामंडळाक 912 टन भाजी मेळिल्ली. ताचे बदलांत शेतकारांक म्हामंडळान 3.19 कोटी रुपया फारीक केल्ले. 2022-23 त भाजी उत्पादकांची संख्या 1,344 इतली जाली आनी तांचे कडल्यान 1,188 टन भाजी म्हामंडळाक मेळ्ळी आनी ताचे बदलांत शेतकारांक 3.36 कोटी रुपयांचें वितरण केलें अशें देसाय हांणी सांगलें.

2021-22 चे तुळेन 2022-23 त गोंयचो भेंडो, दुदी ह्या भाजयांच्या उत्पादनांत वाड जाल्या. 2021-22 त 255.91 टन भेंडो आनी 48.40 टन दुदयाचें उत्पादन जाल्लें. 2022-23 त भेंड्याचें उत्पादन 262.37 टन जाल्यार दुदयाचें उत्पादन 104.52 टनांचेर पावलां. हाचे बगर कोबी, कारातीं, गाजर, वायंगें हांचेंय व्हड प्रमाणांत उत्पादन मेळ्ळां अशेंय देसाय हांणी म्हणलें.

ह्या कारणांक लागून शेतकार आकर्शीत जाले

– कोरोना काळांत हेर राज्यांतल्यान येवपी भाजयेची पुरवण उणी पडूंक लागिल्ल्यान थळावे भाजयेक म्हत्व आयलें. कोविडाच्या दोन वर्सांत थळाव्या भाजी विक्रेत्यांनी व्हड प्रमाणांत भाजयेचें उत्पादन घेतलें. ताचे बदलांत तांकां व्हड अर्थीक फायदोय मेळिल्लो.

– कोविडा उपरांत भाजी उत्पादनांत येवपी शेतकारांचे संख्येंत वाड जायत गेली. खूबशा तरणाट्यांनी पडींग जमनींत भाजीपाल्याचें उत्पादन घेवपाक सुरवात केली.

– गोंय फलोत्पादन म्हामंडळा कडल्यान थळाव्या शेतकारांचे भाजयेक बरो दर दितात. ताका लागून शेतकार भाजी उत्पादना कडेन वळत आसात.

सेंद्रीय पद्दतीन भाजी लागवडीक प्रोत्साहन

‘आत्मनिर्भर भारत-स्वयंपूर्ण गोंय’ मोहिमेच्या केंद्रस्थानार कृशी विकास होच आसा. गोंयांतल्या चडांत चड शेतकारांनी भाजी लागवडी कडेन वळचें आनी गोंयची गरज भागतली इतलें उत्पादन तांणी घेवचें हे खातीर सरकार सेगीत यत्न करीत आसा. ते खातीर भाजी उत्पादक शेतकारांक फलोत्पादन म्हामंडळ आनी कृशी खात्या कडल्यान गरजेचें तें सहकार्य दितात. ताका लागून भाजी उत्पादक आनी उत्पादनांत वाड जायत आशिल्ल्याचें चंद्रहास देसाय हांणी सांगलें. शेतकारांनी सेंद्रीय पद्दतीन भाजीची लागवड करची हे खातीर तांकां प्रोत्साहन दीत आशिल्ल्याचें तांणी म्हणलें.