भांगरभूंय | प्रतिनिधी
-केरळांतले रंजीत श्रीनिवासन हांची तांच्या घरांत घुसून केल्ली हत्या
बंगळुरूः केरळांतल्या भाजपाच्या ओबीसी फुडाऱ्याची हत्या केल्ले प्रकरणांत न्यायालयान पीएफआयच्या 15 आरोपींक मरण ख्यास्त केल्या. सगले आरोपी बंदी घातिल्ल्या पॉप्युलर फ्रंट ऑफ इंडिया (पीएफआय) हे संघटणेचे वांगडी अाशिल्ले. शेनवारा न्यायालयान ह्या 15 जाणांचेर दोशारोप दवरिल्ले. ते उपरांत मानेलीक्कर जिल्हो न्यायालयान तांकां मरण ख्यास्त दिल्या. 2021 त भाजपाचे फुडारी रंजीत श्रीनिवासन हांची तांच्या घरांत घुसून हत्या केल्ली.
आठ आरोपी प्रत्यक्ष हत्या करपांत वांटेकार जाल्ले. जाल्यार हेर आरोपींनी ह्या गुन्यांवांत मुख्य आरोपींक मजत केल्ली. केरळांतल्या भाजपाचे ओबीसी विभागाचे फुडारी रंजीत श्रीनिवासन हांची 19 डिसेंबर 2021 त तांच्या घरांत घुसून हत्या केल्ली. तांच्या कुटुंबियांच्या मुखारूच आरोपींनी रंजीत हांची हत्या केल्ली.
पीएफआय संघटणेचेर 2022 त बंदी घातिल्ली. अजमल, अनूप, मोहम्मद अस्लम, अब्दुल कलाम ऊर्फ सलाम, सफरुद्दीन, मन्शद जसीब राजा, नवाज, समीर, नझीर, अब्दुल कलाम, झाकीर हुसैन, शाजी, नैसम आनी शेरनास अश्रफ ह्या 15 आरोपींक जिल्हो न्यायालयान मरण ख्यास्त दिल्या.
रंजीत हांची घरकान्न लिशा हांणी ह्या निर्णया उपरांत समाधान उक्तायिल्लें. हे फक्त एक हत्येचें प्रकरण न्हय, जाल्यार दुर्मिळांतलें दुर्मीळ प्रकरण आसा. कुटुंबियांच्या मुखारूच म्हज्या घरकाराची हत्या केल्ली, अशें घरकान्न लिशा हिणें सांगल्लें.
——————-
हल्लेखोरांनी फातोड्डेर घरांत घुसून केल्ली मारपेट
91 डिसेंबर 2021 दिसा रंजीत श्रीनिवास अलाप्पुझा शारांतल्या तांच्या घरा मॉर्नींग वॉक खातीर तयार जायत आसतना हल्लेखोर तांच्या घरांत घुसले. ह्या वेळार तांची आवय, घरकान्न आनी भुरगींय घरांत आशिल्ली. हल्लेखोरांनी रंजीत श्रीनिवासन हांकां मरण ये मेरेन मारपेट केली. तातूंत ते गंभीर जखमी जाल्ल्यान तांकां जाग्यारूच मरण आयिल्लें. तांणी भाजपाचे उमेदवार म्हूण विधानसभा वेंचणूक लडयिल्ली. ते वकील आशिल्ले. एसडीपीआयन आरएसएस कार्यकर्त्यांचेर हल्ल्याचो कट रचिल्ल्याचो आरोप केल्लो. पक्षाचे मुखेली एमके फैजी हांणी सोशल मिडियाचेर व्हायरल केल्ले प्रमाण, ही घडणूक संघ परिवाराच्या जातीय हिंसाचाराचो आनी राज्यांत कायदो सुवेवस्था इबाडपाच्या अजेंड्याचो भाग आसा. आरएसच्या आतंकवाद्याचो आमी निशेध करतात. केरळ पुलिसांची उदासीन वृत्ती राष्ट्रीय स्वयंवेक संघा खातीर घातक थारता.
————————-
सरकारान ऑगस्ट 2022त पीएफआयचेर घातिल्ली बंदी
केंद्र सरकारान 27 ऑगस्ट 2022 दिसा पीएफआय संघटणेचेर पांच वर्सां खातीर बंदी घातिल्ली. यूएपीए (बेकायदो कृत्य प्रतिबंध कायदो) खाला सरकारान ही कारवाय केल्ली. पीएफआय तशेंच आनीक 8 संस्थांचेर कारवाय केल्ली. पीएफआय आनी तांचे कडेन संबंदींत संघटणांच्यो कारवायो देशाच्या सुरक्षे खातीर घातक आशिल्ल्याचे सरकारान म्हणिल्लें. ह्या सगल्या आड आतंकवादी आशिल्ल्याचे पुरावे मेळिल्ले.
——————–
एका दिसां पयलीं केल्ली एसडीपीआय फुडाऱ्याची हत्या
सोशल डमोक्रेटीक पार्टी ऑफ इंडिया (एसडीपीआय) फुडाऱ्याची रंजीत श्रीनिवासन हांचे हत्येच्या एक दीस आदीं हत्या केल्ली. 18 डिसेंबराच्या रातीं एसडीपीआयचे राज्य सचीव केएस शान आपल्या मोटारसायकली वयल्यान घरा वताले. तेन्ना तांकां मोटारीन धपको दिलो. उपरांत तांचेर चाकवान हल्लो केलो. जखमी अवस्थेंत तांकां हॉस्पिटलांत व्हरतना वाटेतूच मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
