भाजप प्रवेशाचो सध्या विचार ना

भांगरभूंय | प्रतिनिधी

प्रा. पार्सेकारः योग्य वेळार निर्णय घेतलों, शिक्षणीक, समाजीक कामांत व्यस्त

भांगरभूंय I प्रतिनिधी
पणजी : भारतीय जनता पक्षांत प्रवेश करपाचो सध्या तरी विचार ना. पक्षांतल्या काय लोकांक हांव नाका जालो, हाचे खातीर हांव पक्ष सोडून गेलो. योग्य वेळार हांव भाजपांत प्रवेश करचो वा ना, हाचेर निर्णय घेतलो. राजकारणांत सक्रीय आसतना हांव जितलो व्यस्त आसतालो, तितलोच आता लेगीत आसा, अशें आदले मुख्यमंत्री प्रा. लक्ष्मीकांत पार्सेकार हांणी म्हणलें.
लक्ष्मीकांत पार्सेकार हे सध्या राजकी विजनवासांत आसात. फाटले विधानसभा वेंचणुकेंत मांद्रें मतदारसंघांत अपक्ष म्हूण तांणी वेंचणूक लडयिल्ली. पूण ते हारले. भारतीय जनता पक्षाचे प्रदेश अध्यक्ष म्हूण दोन कार्यकाळ तांकां मेळ्ळ्यात.
लक्ष्मीकांत पार्सेकार आनी उत्पल पर्रीकार हांकां भाजपांत प्रवेश दिवपा विशींचो निर्णय केंद्रीय नेतृत्व घेतले. हांव वा प्रदेश भाजप निर्णय घेवंक शकना, अशें भाजप प्रदेश अध्यक्ष सदानंद शेट तानावडे हांणी स्पश्ट केलां.
हे फाटभुंयेर भाजपांत प्रवेश करपाक इत्सूक आसात व्हय? असो प्रस्न पार्सेकार हांकां पत्रकारांनी विचारिल्लो. अजून कितेंच निर्णय घेवंक ना. भाजपांत प्रवेश करचो, असो प्रस्ताव येवंक ना. योग्य वेळार निर्णय घेतलो, अशें पार्सेकार हांणी सांगलें.