भांगरभूंय | प्रतिनिधी
भांगरभूंय । प्रतिनिधी
म्हापशेंः भाजप सरकार गोंयची शांतताय आनी एकचार इबाडटा. जाणा जावंन समाजांत फूट घालपाचे यत्न करता. कळंगुटेंत छत्रपती शिवाजी म्हाराजाच्या पुतळ्या वयल्यान ही गजाल उक्ताडार आयल्या. काँग्रेस पक्ष हे गजालीचो निशेध करता. आमी गोंयचे दुसरें मणिपूर जावपाक दिवचे नात अशें काँग्रेस फुडारी रिची भार्गव हिणे म्हापश्यां काँग्रेस कार्यालयांत घेतिल्ले पत्रकार परिशदेंत सांगलें.
राज्यांतल्या भाजप सरकाराक उदरगतीचीं कामां करपाक अपेश आयलां. लोकसभा वेंचणूक लागीं आयिल्ल्यान लोकाचें लक्ष दुसरे कडेन व्हरपा खातीर हें सरकार अशे तरेन लोकां मदीं फूट घालपाचे यत्न करून राज्यांतली शांततायेचो भंग करपाक सोदता असो आरोप रिचीन केला. लोकांचे प्रश्न आनी समस्या सुटाव्यो करपाचे सुवातेर हें सरकार धर्मीक दंगली, मारपेट आनी हेर मुद्द्यां वयल्यान लोकांचो बुद्धिभेद करता अशें तिणे सांगलें.
काँग्रेस पक्षाचो फुडारी राहुल गांधी भारत जोडो यात्रा काडून लोकांक जोडपाचो यत्न करता जाल्यार भाजप सरकार लोकां मदीं फूट घातला अशेय तिणे सांगलें. लोकसभा वेंचणुकेचे फाटभुंयेर भाजप सरकारान कळंगुटे सारक्या वाठारांत मुद्दाम जावंन शिवाजी म्हाराजाच्या पुतळ्या वयल्यान राजकारण करता. कळंगुटे पंचायत मंडळांत भाजपाचें वर्चस्व आसतना तांणी पुतळ्या संबंदी नोटीस काडल्या उपरांत सरकार कित्याक ओगी आशिल्लें असो प्रश्न पक्षाचो सरचिटणीस विजय भिके हाणे केला. पत्रकार परिशदेक विश्वास नागवेकार, देवसुरभी यदुवंशी, रोनाल्डो रूझारियो, रायन लोबो, प्रदीप हरमलकार आनी प्रमेश मयेकार हाजीर आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
