भांगरभूंय | प्रतिनिधी
एल्टन डिकॉस्टाः ‘फिफा’ बायलांचे मॅचीक अर्दें स्टेडियम रितें आशिल्ल्याचो दावो
भांगरभूंय । प्रतिनिधी
मडगांवः गोंयांत फिफा अंडर -17 बायला संवसारीक मॅची वेळार अर्दें स्टेडियम रितें आसप ही सामकी दुर्देवी गजाल. केपें मतदारसंघांतल्या शालेय विद्यार्थ्यांक पास जारी करचे अशी आपणे विनावणी केल्ली. पूण ताचे कडेन खेळां संचालकांनी आडनदर केल्या. भाजपा सरकारचें लक्ष फक्तत इव्हेंट मॅनेजमेंटाचेर आसा. मिशन कमिशनाचें धोरण चालीक लावन ‘माया’ जोडपांत सरकार व्यस्त आसा. मुख्यमंत्री डॉ. प्रमोद सावंत हांणी तत्काळ हस्तक्षेप करून शालेय विद्यार्थ्यांक फुटबॉल मॅची पळवपाक प्रवेश दिवचो, अशी मागणी केपेंचे आमदार एल्टन डिकॉस्टा हांणी केल्या.
मॅच पळोवपाक इत्सूक आशिल्या केपें मतदारसंघांतल्या शालेय विद्यार्थ्यांक पास दिवपाची विनवणी आपणे खेळां संचालकां कडेन केल्ली. मात, तांणी आपले विनवणेकडे पुराय आडनदर केली. ताचो परिणाम म्हणल्यार अर्दे स्टेडियम रितें उरलें, अशें एल्टन डिकॉस्टा हांणी म्हणलां.
फिफा अंडर-17 बायलां संवसारीक सर्ती खातीर इव्हेंट मॅनेजमेंट एजन्सी वेंचपा खातीर गोंयच्या खेळां प्राधिकरणान काडिल्या निविदांचेर काँग्रेस पक्षान सरकाराक शिटकावणी दिल्ली. सरकारान 3.8 कोटींची अदमाशें किंमत आशिली निविदा गडबडीन जारी करून एजन्सी वेंचून काडली. वेंचून काडिल्ले एजन्सीक काम करपा खातीर 24 वरां परस उणो वेळ दिलो. एकंदर निविदा प्रक्रियेचो गोंदळ आतां उक्तडार आयला, अशें डिकॉस्टा हांणी म्हणलां.
सर्तीच्या पयल्या दिसा दनपारां आपल्याक दोन व्हीआयपी पास आनी फकत 25 सामान्य पास दिले. आयज दुसऱ्या दिसाचे मॅची खातीर फकत 25 पास मेळ्ळें. मॅचीच्या पासांची वेळार छपाय आनी वितरण करपाक सरकार अपेशी थारलां, हे स्पश्ट दिसता. भाजप सरकारचें लक्ष फक्त मिशन कमिशनाचेर आसा. एकंदर वेवस्थापनाचें बारा बिरेस्तार आनी तेरा शुक्रार जाल्यात, असो आरोप डिकॉस्टा हाणी केला. मुख्यमंत्री डॉ. प्रमोद सावंत हांणी बेगोबेग हस्तक्षेप करून फुटबॉल मोगी, शालेय भुरग्यांक तांच्या वळखपत्रा सयत स्टेडियमांत प्रवेश दिवन मॅच पळोवपाची परवानगी दिवची, अशी मागणी डिकॉस्टा हांणी केल्या.
गोंयच्या पंगडाक आमंत्रण नाः एल्टन
नवी दिल्ली जाल्या राष्ट्रीय पावंड्या वयले 61 व्या सुब्रतो मुखर्जी कप फुटबॉल सर्तींत गोंयचें प्रतिनिधित्व केल्या अंडर- 17 चलयांक फिफा फुटबॉल मॅच पळोवपाक आमंत्रित करुंक ना. तशेंच तांकां पास दिवंक ना, हें आयकून आपल्याक धपको बसलो. हाचे वयल्यान गोंयांत फुटबॉलाक चालना दिता अशी जीं सरकार नाटकां करता, तीं उजवाडाक आयल्यात, अशें एल्टन डिकोस्टा हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
