भांगरभूंय | प्रतिनिधी
खणी परतून सुरू करपाक काँग्रेसीचो तेंको
म्हापशें: गोंयचो खण वेवसाय बंद करपाक वा खणी परतून सुरू करपाक काँग्रेसीन केन्नाच विरोध केलो ना. उरफाटें भाजपानूच ह्यो खणी बंद उडोवन लोकांच्या रोजगाराची वाट लायली असो आरोप हळदोणेंचे आमदार अॅड. कार्लुस फेरेरा हांणी केलो.
म्हापश्यां काँग्रेस कचेरेंत आयोजीत केल्ले पत्रकार परिशदेंत ते उलयताले. ह्या वेळार विजय भिके, जिल्हो अध्यक्ष विरेंद्र शिरोडकार, सचीन किटलेकार, मिताली गडेकार आनी हेर पदाधिकारी हाजीर आशिल्ले.
खणी परतून सुरू करपाक आमचो राज्य सरकाराक पुराय तेंको आसा. पूण खणी सुरू करतना सरकारान पक्षपात, वंचीतपणा वा भ्रश्टाचाराक थारो दिवचो न्हय. सरकारान खणींची पावणी करचे परस स्वता खणी चलोवच्यो. कारण पावणेक लागून जे कोण पावणेर खणी घेतले ते फक्त आपल्याच लोकांक रोजगार दितले. जाल्यार सरकारान त्यो चलयल्यार गोंयकारांक हाचो चड लाव मेळटलो अशें अॅड. फेरेरा हांणी म्हणलें.
खणी सुरू करतना समग्र अर्थवेवस्थेचो विचार जावचो. सरकारान आतां 2023 मेरेन खणी सुरू करपाचो दावो केला. पूण प्रत्यक्षांत वेळ लागूंक शकता. सगल्या सोपस्कारा प्रमाण खणी सुरू करच्यो पडटल्यो. तशेंच भौशीक सुनावणी घेवची पडटली अशें तांणी म्हणलें.
विजय भिके हांणी म्हणलें, सरकारान पारदर्शकतायेन खणी सुरू करच्यो. 2024 वर्साची लोकसभा वेंचणूक नदरे मुखार दवरून हाचो गैरवापर करचो न्हय. 2022चे वेंचणुकेंत ह्याच भाजप सरकारान मतदारांक नोकऱ्यांचें हांयस दाखयिल्लें अशी टिका केली.
विधानसभेंत सरकाराक विरोध करपा खातीर विरोधकांचो चड आंकडो जायच अशें ना. योग्य नियोजन आनी अभ्यास हाचो उपेग करून सरकाराक कोंयडेंत धरूं येता. काँग्रेसीक आतां पुनरुज्जीवीत करपाची बरी संद आसा. आमी शंबर टक्के हें काम करतले. पक्षा कडेन गद्दारी केल्ल्यांक लेगीत योग्य धडो शिकयतले. फुडारांत काँग्रेस पक्ष नवी क्रांती घडयतलो असो आत्मविस्वास आमदार अॅड. कार्लुस फेरेरा हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.