भांगरभूंय | प्रतिनिधी
विजय सरदेसायः भीक घेवन वेंचणूक लडचों नाशिल्ल्याचें स्पश्ट
भांगरभूंय । प्रतिनिधी
पणजीः भाजपांत वचपाची वाट आपल्याक खबर आसा, पूण आपूण वच्चों ना. तशेंच हेर पक्षां कडेन भीक मागून लोकसभेंचे वेंचणुकेंत गोवा फॉरवर्डाचे उमेदवार देंवोवचो ना, अशें आमदार तशेंच गोवा फॉरवर्डाचे अध्यक्ष विजय सरदेसाय हांणी स्पश्ट केलें. पणजेच्या पक्ष कार्यालयांत बुधवारा घेतिल्ले पत्रकार परिशदेंत ते उलयताले.
विजय सरदेसाय भाजपांत प्रवेश करपाक इत्सूक आशिल्ल्याचें भाजपाच्या म्हणयाऱ्यान कांय दिसां आदींच म्हणिल्लें. तातूंत तथ्य आसा व्हय, असो प्रस्न पत्रकारांनी सरदेसाय हांकां विचारिल्लो.
भाजपा म्हणयाऱ्यान तें आपल्याक सांगपाची गरज ना. आपल्याक खंय वचपाचें आसत जाल्यार गोंयकारांक सांगून वतलों. लिपचोरयां हेर पक्षांत वचप आपल्या सभवांत ना, अशें सरदेसाय हांणी सांगलें. कांय पक्ष हेर पक्षां कडल्यान पयशे घेवन वेंचणुको लडटात. आमी तशें करिनात. हेर पक्षां कडल्यान पयशांची भीक घेवन गोवा फॉरवर्ड वेंचणुकेंत देंवचो ना, अशेंय सरदेसाय हांणी नमूद केलें.
‘प्रलंबीत प्रस्न परतून मांडटलों’
लोकांचे नदरेन म्हत्वाचे आशिल्ले म्हादय, कायदो- सुवेवस्था, मदले सुटयेंतलो आहार, पणजी स्मार्ट सिटी हे सारके गोंयांतले खूबशे प्रस्न अजून कायम आसात. त्या सगळ्या प्रस्नांचेर आपूण अर्थसंकल्पीय अधिवेशनांत आवाज काडटलों. हे खेपेय सगळे विरोधी आमदार आपल्याक तेंको दितले, असोय विस्वास आमदार विजय सरदेसाय हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
