भांगरभूंय | प्रतिनिधी
भारताचो दादल्यांचो हॉकी पंगड राष्ट्रकूल खेळां सर्ती पयलीं बंगळुरूंत भारतीय खेळां प्राधिकरण केंद्रांत प्रशिक्षण घेता. भारताच्या पंगडाचो डिफॅण्डर सुरेंद्र कुमारान आपले तयारी विशीं सांगलें, पंगडाचें लक्ष्य सद्या शारिरीक तंदुरुस्तीचेर आसा. हाचे खेरीत हेर विभाग घटमूट करपाचेर लेगीत काम केलां.
राष्ट्रकूल खेळां सर्ती खातीर भारताक ब गटांत सुवात दिल्या. हातूंत इंग्लंड, कॅनडा, वेल्स आनी घाना आसा. भारताची पयली मॅच 31 जुलयाक घाना आड जातली.
आमी खंयच्याच पंगडाक उणे लेखचे नात. तशेंच दरेक खेपे फक्त एकेच मॅचीचेर लक्ष केंद्रीत करतले. सध्या आमची नदर घाना आड जावपी मॅचीचेर आसा. पूण, आमची मोख भांगरा पदक आसा अशें सुरेंद्रान मुखार सांगलें.
प्रतिस्पर्धी पंगडांच्या मॅचींचे आदले व्हिडियो आमी सध्या पळयतात. आमचो मुख्य प्रशिक्षक तेच दिश्टीन रणनिती तयार करपाक लागला. खंयचीच मॅच सोंपी आसची ना अशें ताणें मुखार म्हणलें. 2021-22तले राष्ट्रकूल खेळां सर्तींत भारतान तिसरी सुवात मेळयिल्ली.
राष्ट्रकूल खेळां सर्तींत भांगरा पदक जिखप आमची मोख आसा. हेर गजाली आमच्या प्रदर्शनाचेर निंबून आसतल्यो. टोकियो ऑलिम्पिका उपरांत आमी ज्यो मॅची खेळ्ळ्यात, तातूंत समाधानकारक प्रदर्शन केलां. आमी कांय बळिश्ठ पंगडां आड खेळ्ळ्यात आनी ताचो आमको फायदो जाला अशें सुरेंद्रान सांगलें.
पंगडांत अणभवी आनी युवा खेळगड्यांचें मिश्रण आसा. निवड समितीच्या ह्या निर्णयाक सुरेंद्रान येवकार दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
