भांगरभूंय | प्रतिनिधी
खण आनी भूगर्भ संचालनालयान घडयला पंगड; आयच्यान सत्तरी म्हालांत अंमलबजावणी
भांगरभूंय । प्रतिनिधी
वाळपयः सत्तरी म्हालाच्या खूबशा वाठारांनी व्हड प्रमाणांत चालू आशिल्ल्या बेकायदो चिऱ्यांखणी आड गोंय सरकाराच्या खण आनी भूगर्भ संचालनालयान घोळट्या पंगडाची स्थापना केल्या. ताची अंमलबजावणी 11 सप्टेंबर सावन सुरू जातली. ह्या घोळट्या पंगडाच्या माध्यमांतल्यान सत्तरी म्हालांतल्या बेकायदो चिऱ्यांखणींचेर नदर दवरतले आनी तांचेर कारवाय करतले. ह्या निर्णयाक सत्तरीकारांनी येवकार दिला. तरी लेगीत हो घोळटो पंगड खऱ्यांनीच बेकायदो चिऱ्यांखणींचेर कारवाय करपाक येसस्वी थारतलो काय ना, असो दुबाव लेगीत उक्तायला.
मेळिल्ले म्हायती प्रमाण फाटल्या धा वर्सां सावन सत्तरी म्हालाच्या साबार वाठारांनी बेकायदो चिऱ्यांखणीं सुरू आसात. तांचेर कारवाय करपाक खण आनी भुगर्भ संचालनालय, पुलीस यंत्रणा, उपजिल्होधिकारी, मामलेदार कार्यालय पुराय अपेशी थारलां. ह्या बेकायदो चिऱ्यांखणींक लागून व्हड प्रमाणांत पर्यावरणाचें लुकसाण जाता. ह्या चिऱ्यांखणींचेर कारवाय करची, अशी थळावे पंचायतीचे ग्रामसभेंत खूब खेपे थळाव्या लोकांनी मागणी केल्ली. तशेंच हे संबंदांतलीं निवेदनां खूब खेपे संबंदीत खात्याच्या अधिकाऱ्यांक सादर केल्लीं. मात अजून मेरेन कायदेशीर कारवाय जावंक ना.
मजगतीं, हाची विशेश दखल घेवन सरकारान सत्तरी म्हालांतल्या बेकायदो चिऱ्यांखणींचेर बारीक नदर दवरचे खातीर घोळट्या पंगडाची स्थापना केल्या. ह्या पंगडांत खण आनी भूगर्भ संचालनालयाचे अधिकारी, सत्तरी म्हालाचे मामलेदार, उपजिल्होधिकारी, पुलीस खात्याचे थळावे निरिक्षक, थळावे पंचायतीचे तलाठी, भौशीक बांदकाम खात्याचे अधिकारी हांची नेमणूक केल्या. हो पंगड बेकायदो चिऱ्याखण वेवसायाचेर नदर दवरलो. ज्या वाठारांत बेकायदो चिऱ्याखणी सुरू आसात ताची म्हायती पंगडाक मेळटकच रोखड्या रोखडी तिचेर कारवाय करतलो.
घोळट्या पंगडाच्या माध्यमांतल्यान बेकायदो चिऱ्यांखणीच्या वेवसायाक आळाबंद घालतले. हे संबंदांतली म्हायती संबंदीत खात्याक मेळटकच ताकतिकेन ते खणीचेर कारवाय करतले, अशें हे संबंदांत खण आनी भूगर्भ संचालनालयाच्या संचालकांनी जारी केल्ल्या आदेशांत म्हणलां. बेकायदो चिऱ्यांखणींचो वेवसाय थळाव्यां खातीर त्रासाचो जाला. ताका लागून सरकारान एक तर ह्यो बेकायदो चिऱ्यांखणी कायदेशीर करच्यो वा त्यो बंद तरी करच्यो, अशी मागणी थळाव्या लोकांनी केल्या.
दोळ्यांक उदक लावपाचो हो प्रकारः सत्तरीकार
बेकायदो चिऱ्यांखणींचेर नदर दवरपा खातीर घोळट्या पंगडाची स्थापना करप हो लोकांच्या दोळ्यांत उदक लावपा सारको प्रकार आसा. कारण ह्या पंगडांत ज्या अधिकाऱ्यांची नेमणूक केल्या त्या अधिकाऱ्यांक बेकायदो चिऱ्यांखणींचेर कारवाय करपाचो पुराय अधिकार आसा. तरी लेगीत तांणी हे आदीं कित्याक कारवाय करूंक ना? बेकायदो चिऱ्यांखणींचेर कारवाय करपाचें धाडस त्या घोळट्या पंगडांतल्या अधिकाऱ्यांक खऱ्यांनीच आसा? असो प्रस्न कांय थळाव्या नागरिकांनी प्रतिनिधी कडेन उलयतना उपस्थीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
