भांगरभूंय | प्रतिनिधी
पर्यटन खात्याच्या सगल्याच सेवांच्या ऑनलायन नोंदणीचें उक्तावण
पणजी : गोंयच्या पर्यटन क्षेत्रांत कसल्याच प्रकाराच्या बेकायदो गजालींक थारो दिवचे नात, अशी शिटकावणी मुख्यमंत्री डॉ. प्रमोद सावंत हांणी सोमारा पत्रकारां कडेन उलयतना दिली. बेकायदो कृत्यां थांबोवपाक पुलिसां कडल्यान धाडी सुरू आशिल्ल्याचेय तांणी नमूद केले.
पर्यटन खात्याच्या सगल्याच सेवांच्या ऑनलायन नोंदणीच्या उक्तावणा वेळार मुख्यमंत्री उलयताले. पर्यटन मंत्री रोहन खंवटे, पर्यटन विकास म्हामंडळाचे अध्यक्ष गणेश गांवकार, मुख्य सचीव पियुषकुमार गोयल, सचीव रवी धवन ह्या वेळार हाजीर आशिल्ले.
पर्यटन खात्याच्यो सगल्योच सेवा हाचे मुखार ऑनलायन पद्दतीन मेळटल्यो. ताचो उद्देग जगताक व्हड फायदो जातलो. गोंयाक देशाची पर्यटन राजधानी करपाक हाची गरज आशिल्ली, अशें मुख्यमंत्र्यान म्हणलें. गोंयांत अायिल्ले पर्यटक फक्त दर्यादेगां पुरतेच मर्यादीत उरतात. ह्या पर्यटकांक गांवगिऱ्या वाठारांतल्या पर्यटनाचो आस्वाद घेवपाक मेळचो, हे खातीर राज्यांतली भौशीक येरादारी शेनवार आनी आयताराय सुरू दवरतले, अशें तांणी म्हणलें. गोंयच्या पर्यटन वाडी खातीर येवपी काळांत विवीध प्रकाराच्यो कार्यावळी राबयतले, अशें मुख्यमंत्र्यान नमूद केलां.
G20 शिखर परिशदेचें गोंयांत आयोजन
‘जी-20’ समीट’ कार्यावळी निमतान प्रधानमंत्री नरेंद्र मोदी गोंयांत येवपाचे आसात, अशी म्हायती प्रधानमंत्र्यान आपणाक दिल्ली भेटी वेळार दिल्या. हे कार्यावळीचो पर्यटन वाडीक व्हड फायदो जातलो, असो विस्वास मुख्यमंत्री डॉ. प्रमोद सावंत हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
