भांगरभूंय | प्रतिनिधी
नितीश कुमार हांणी घेतलो मुख्यमंत्रीपदाचो सोपूत
राजदा कडेन युती, तेजस्वी यादव उपमुख्यमंत्री
खबरां संस्था
पाटणाः भाजपा कडली युती तोडले उपरांत जेडीयून परतून राजदा कडेन युती करून नवें सरकारा घडयलां. जेडीयूचे नितीश कुमार हांणी काल आठवे खेपे बिहारच्या मुख्यमंत्रीपदाचो सोपूत घेतलो. जाल्यार लालू प्रसाद यादव हांचो पूत आनी राजदचे फुडारी तेजस्वी यादव हांणी उपमुख्यमंत्रीपदाचो सोपूत घेतलो.
नितीश कुमार हांणी परतून एकदा लालूप्रसाद यादव हांच्या आरजेडी कडेन युती करून म्हागठबंधन सरकाराची सत्ता बिहारांत हाडली. नितीश कुमार हांचे भुमिकेन बिहारांत भाजपाक व्हड धपको बसला.जेडीयू-भाजप सरकार कोसळ्ळें. ताका लागून महाराष्ट्रांत शिवसेनेंत फूट पाडून सत्ता मेळोवपी भाजपाक बिहारांतली सत्ता वगडावची पडली.
नव्या सरकाराच्या मंत्रीमंडळ विस्तारा विशीं अजून निर्णय जावंक ना. बिहारांतल्या म्हागठबंधन सरकारान जेडीयू, राजद, काँग्रेस, हम आनी वाम दल पक्षांचो आस्पाव आसा.
नितीश कुमार हांणी भाजपा कडेन आशिल्ली युती तोडून म्हागठबंधन केले. हातूंत वट्ट सात पक्ष आसात. म्हागठबंधनांतल्या सगल्या पक्षांचे वट्ट 164 आमदार आसून ह्या आमदारांच्या तेंक्याचें पत्र तांणी 9 ऑगस्टाक राज्यपालां कडेन सोंपयले. ते उपरांत काल 10 ऑगस्टाक राज्यपालांनी तांकां सोपूतविधी खातीर आपयिल्ले.
म्हागठबंधनाचें सरकार स्थापन करपा पयलीं नितीश कुमार हांणी भाजपा वांगडाची युती तोडली. दोन वर्सां पयलीच भाजप – जेडीयू हांणी एकठांय येवपाचो निर्णय घेतिल्लो. फाटल्या कांय दिसां पसून एसजेडी आनी भाजपा हांचे मदीं वाद चालू आशिल्लो. अखेर नितीश कुमार हांणी आपल्या मुख्यमंत्रीपदाचो राजिनामो दिवन भाजपा वांगडाची युती तोडली. उपरांत राजद पक्षाक वांगडा घेवन म्हागठबंधन सरकार घडोवपाचो निर्णय घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
