भांगरभूंय | प्रतिनिधी
तीन मुख्य सुत्रधार, कॉन्स्टेबला सयत आठ जाणांक अटक
भांगरभूंय । प्रतिनिधी
पणजीः केंद्रीय महसूल गुप्तचर संचालनालयाच्या (डीआरआय) गोंय विभागाचे अधिकारी गिरायक जावन बिबट्याच्या कातड्यांची तस्करी करपी जम्मू- काश्मीरांतले टोळयेचो पर्दाफाश केलो. डीआरआयन तीन मुख्य सुत्रधारां सयत 8 जाणांक अटक केली. तांचे कडल्यान 2 कोटी रुपया मोलाच्यो बिबट्याच्यो 4 कातड्यो जप्त केल्यो. तातूंत जम्मू- काश्मीर पुलिशेच्या एका कॉन्स्टेबलाचो आस्पाव आसा.
केंद्रीय महसूल गुप्तचर संचालनालयाच्या (डीआरआय) गोंय विभागान दिल्ले म्हायती प्रमाण, गोंय आनी कर्नाटकांत बिबट्यांचे तस्करी खातीर गिरायकांच्या सोदांत रानवटी जीव वेपार करपी एक टोळी आशिल्ल्याची म्हायती जीआरआयच्या एका अधिकाऱ्याक मेळिल्ली. ते प्रमाण, डीआरआय गोंय विभागाचे अधिकारी ते टोळयेचो सोद घेताले. हे मजगतीं, गोंय विभागाचे अधिकारी ते टोळयेच्या मागार आशिल्ले. एक पंगड चेन्नय धाडिल्लो. टोळयेचो मुख्य सुत्रधार जम्मू- काश्मीरांतले आशिल्ल्याची म्हायती मुखार आयली. डीआरआयचो पंगड चेन्नायच्यान बंगळुरू पावलो आनी श्रीनगरांतले टोळयेच्या एका मुख्य सुत्रधारा कडेन संपर्क केलो. डीआयआरचो एक अधिकारी बंगळुरू एक व्हड उद्देजक जावन ताचे कडेन संपर्क केलो आनी नमुनो दाखोवपाची मागणी केली. ते प्रमाण डीआयआरचो पंगड 10 ऑगस्टाक श्रीनगर पावलो. ते उपरांत थंय मंसूल एहमद बांडे ह्या मुख्य सुत्रधारा कडेन बिरेस्तारा संवाद सादलो. ह्या वेळार एक अधिकारी उद्देजकाचो कर्मचारी आशिल्ल्याचें भासोवन ताच्या वांगडा गेलो. थारिल्ले प्रमाण बांडे हाणें एका बिबट्याचें कातडें ताका दाखयलें. ह्याच वेळार सांपळो लावन बसिल्ल्या जीआयआरच्या पंगडान ताका ताब्यांत घेतलो.
मजगतीं, दुसरो पंगड आनीक मुख्य सुत्रधाराच्या संपर्कांत आशिल्लो. त्या पंगडान शुक्रारा शाफीक बाबजादा आनी झाकीर हुसेन पाल ह्या दोग मुख्य सुत्रधारांक ताब्यांत घेतले. तांचे कडल्यान आनीक दोन बिबट्यांचें कातडें जप्त केलें. वयल्या तिगांची खोलायेन चवकशी केले उपरांत पंगडान शेनवारा आनीक पांच जाणांक ताब्यांत घेतले. तांचे कडल्यान आनीक एका बिबट्याचें कातडें जप्त केलें. ह्या वेळार पंगडान जम्मू- काश्मीर पुलीस सेवेंतलो कॉन्स्टेबल मंजूर अहमद हाका ताब्यांत घेतलो.
शेनवारां केंद्रीय महसूल गुप्तचर संचालनालयाच्या (डीआरआय) गोंय विभागान मुख्य सुत्रधारा सयत 8 जाणांक अटक करून तांचे कडल्यान 2 कोटी रुपया मोलाचीं बिबट्याच्यो 4 कातड्यो जप्त केलो. फुडले कारवाये खातीर जम्मू- काश्मीर रान खात्याचे सुवादीन केल्यो. ह्या प्रकरणांत रान खात्यान वयल्या दुबावितां आड रानवटी जीव (संरक्षण) कायद्या खाला गुन्यांव दाखल करून कारवाय सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
