बायलां वयल्या अत्याचारांनी पांच वर्सांत नेमान वाड

भांगरभूंय | प्रतिनिधी

पणजीः गोंयांत दिसान दीस बायलां वयलें लिंगीक अत्याचार, बायलांचें अपहरण, घरगुती अत्याचार, शिंदळकी वेवसाय आनी हेर सतावणुकेच्या प्रकरणांनी व्हड प्रमाणांत वाड जाल्ल्याचें मुखार आयलां.

हे फाटभुंयेर गोंयांत 1 जानेवारी 2017 ते 30 जून 2022 मेरेनची आंकडेवारी पळयली जाल्यार बायलां वयल्या अत्याचारांचें 1,658 गुन्यांव नोंद जाल्यात. तातूंतले 1,209 म्हणल्यार 72.91 टक्के प्रकरणांचो तपास लावपाक पुलिशेक येस आयलां. जाल्यार फक्त सात प्रकरणांनी गुन्यांवकारांक ख्यास्त फावो जाल्या, 74 जाणांक दोशमुक्त केल्यात जाल्यार 1,097 प्रकरणांत न्यायालयांक खटले सुरू आसात, अशें कळ्ळां.

1 जानेवारी 2017 ते 30 जून 2022 ह्या काळांत 385 बलात्काराचे गुन्यांव दाखल जाल्यात. तातूंत 87.53 टक्के म्हणल्यार 337 गुन्यांवांचो तपास करून दुबावितांक अटक करपाक पुलिसांक येस मेळ्ळां. तातूंत 2017 त पांच गुन्यांवांनी दुबावितांक न्यायालयान ख्यास्त फर्मायली जाल्यार 28 प्रकरणांनी पुरावे नाशिल्ल्यान तशेंच हेर कारणां लागून दुबावितांची निर्दोश सुटका केल्या. ते भायर सात प्रकरणांतल्या दुबावितांक आरोपांतल्यान मुक्त केले जाल्यार दोन गुन्यांवांतल्या दुबावितांक मरण आयिल्ल्यान न्यायालयान खटले बंद केले. तशेंच 295 प्रकरणांचे न्यायालयांत खटले चालू आसात. 16 प्रकरणांनी पुलीस तपास चालू आशिल्ल्याची म्हायती मेळ्ळ्या. ते भायर 14 प्रकरणांचो अजून तपास लागूंक ना, अशा प्रकरणआंचो पुलिसांनी न्यायालयांत अंतीम अहवाल सादर केला. तेचवरी 15 प्रकरणांनी तथ्य सापडूंक नाशिल्ल्यान पुलिसांनी न्यायालयांत अंतीम अहवाल सादर केल्या, अशीय म्हायती मेळ्ळ्या.

1 जानेवारी 2017 ते 30 जून 2022 ह्या काळांत 274 अपहरण गुन्यांवांची नोंद जाल्या. तातूंत 18.61 टक्के म्हणल्यार 51 गुन्यांवांचो तपास करून पुलिसांनी दुबावितांक अटक करपाक येस मेळयलां. तातूंतल्या एकाय गुन्यांवांत दुबाविताक न्यायालयान ख्यास्त फर्मावंक ना जाल्यार 3 प्रकरणांनी पुरावे नाशिल्ल्यान आनी हेर कारणांक लागून दुबावितांक निर्दोश सोडल्यात. तशेंच 3 प्रकरणांनी दुबावितांक आरोपांतल्यान मुक्त केल्यात. 45 प्रकरणांचो न्यायालयांत खटलो चालू आसा. 21 प्रकरणांनी पुलीस तपास सुरू आसा, अशी म्हायती मेळ्ळ्या. ते भायर 48 प्रकरणांचो अजून तपास लागूंक ना, अशा प्रकरणांचो पुलिसांनी न्यायालयांत अंतीम अहवाल सादर केला, जाल्यार 153 प्रकरणांनी तथ्य सापडूंक नाशिल्ल्यान पुलिसांनी न्यायालयांत अंतीम अहवाल सादर केल्ल्याची म्हायती मेळ्ळ्या. गोंयांत वयल्या काळांत बायलांचो विनयभंग, लिंगीक अत्याचार, शिंदळकी वेवसाय, घरगुती हिंसाचार आनी हेर तरांच्या सतवणुकेच्या 999 गुन्यांवांची नोंद जाल्या. तातूंतल्या 88.18 टक्के म्हणल्यार 821 गुन्यांवांचो तपास करीन पुलिसांनी दुबावितांक अटक करपाक येस मेळयलां. तातूंतल्या 2017 आनी 2018 तल्या दरेकी एका म्हणल्यार फक्त दोन गुन्यांवांनी आरोपींक न्यायालयान ख्यास्त फर्मायल्या जाल्यार 43 प्रकरणांनी पुरावे नाशिल्ल्यान आनी हेर कारणांक लागून दुबावितांची निर्दोश सुटका केल्या. ते भायर 8 प्रकरणांनी दुबावितांक आरोपांतल्यान मुक्त केल्यात जाल्यार 5 गुन्यांवांतल्या दुबावितांक मरण आयिल्ल्यान न्यायालयान खटले बंद केल्यात. तशेंच 757 प्रकरणांचे खटले न्यायालयांत चालू आसात. 51 प्रकरणांनी पुलीस तपास चालू आसा, अशी म्हायती मेळ्ळ्या. ते भायर 88 प्रकरणांचो अजून तपास लागूंक ना, अशा प्रकरणांचो पुलिसांनी न्यायालयांत अंतीम अहवाल सादर केला. जाल्यार 32 प्रकरणांनी तथ्य सापडूंक नाशिल्ल्यान पुलिसांनी न्यायालयांत अंतीम अहवाल सादर केल्ल्याची म्हायती मेळ्ळ्या.