भांगरभूंय | प्रतिनिधी
फोंडें: बायथाखोल बोरी हांगासरल्या घातक जंक्शना कुशीच्या देगणांत टेम्पो कोसळून विनायक खुशाली च्यारी (46, उगें-सांगें) ह्या ड्रायव्हराक मरण आयलें. फोंडें सावन शिरोडें वटेन वचपी ड्रायव्हराचो टेम्पो वयलो ताबो सुटिल्ल्यान तो सरळ 12 ते 15 मिटर खोल देगणांत कोसळ्ळो. कॅबिनांत आडकून पडिल्ल्या ड्रायव्हराक फोंडेंच्या उजो पालोवपी दळाच्या जवानांनी भायर काडलो. फोंडें पुलिसांनी अपघाताचो पंचनामो केला.
मेळिल्ले म्हायती प्रमाण जीए 05 टी 7140 क्रमांकाचो टेम्पो फोंडें सावन शिरोडें वटेन वतालो. दनपारां 3 ते 3.15 वरांच्या सुमाराक बायथाखोल हांगासरल्या देगणांत टेम्पो कोसळ्ळो. हातूंत ड्रायव्हर कॅबिनांत आडकून पडलो. अपघाताची म्हायती मेळटकूच फोंडेंच्या उजो पालोवपी दळाच्या जवानांनी घडणुकेच्या थळार धांव घेवन आडकून पडिल्ल्या ड्रायव्हराक भायर काडलो. गंभीर अवस्थेंत ताका 108 अॅम्ब्युलन्सीन फोंडेंच्या उपजिल्हो हॉस्पिटलांत व्हरतनाच वाटेरूच ताका मरण आयलें.
फोंडें पुलीस स्टेशनाचे अतिरिक्त ताबो आशिल्ले कुळें पुलीस स्टेशनाचे निरिक्षक संजीव दळवी हांच्या मार्गदर्शना खाला उपनिरिक्षक परेश सिनारी हांणी अपघाताचो पंचनामो केला. बुधवारा सकाळीं कुडीची मरणा उपरांतची तपासणी करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
