भांगरभूंय | प्रतिनिधी
मार्च 2023 मेरेन काम पुराय करपाचें अधिकाऱ्यांचें आस्वासन
वास्को: मुरगांव बंदराक जोडपी म्हामार्गाचें बांदकाम रोखड्या रोखडें पूर्ण करपाचे निर्देश वास्कोचे आमदार कृष्णा साळकार हांणी संबंदीत अधिकाऱ्यांक दिले उपरांत संबंदीत अधिकाऱ्यांनी येता त्या मार्च 2023 मेरेन काम पूर्ण करपाचें आस्वासन दिलें.
वरुणापुरी ते सडा चौक, मुरगांव बंदरा मेरेनचो राष्ट्रीय म्हामार्ग फाटल्या फेब्रुवारी म्हयन्यांत उक्तो केल्लो. मजगतीं, बायणा रवींद्र भवन ते मुरगांव बंदराक जोडपी रस्त्याचें काम अजून पुराय जाल्लें ना. ते खातीर अवजड वाहनांची येरादारी शार वाठारांतल्यान चालूच आशिल्ल्यान शार वाठारांतल्या रस्त्यांचेर व्हड प्रमाणांत ताण येत आसा. तशेंच लोकांचीय व्हड प्रमाणांत गैरसोय जायत आसा.
ह्या प्रकरणाची दखल घेवन आमदार साळकार हांणी काल (मंगळारा) मुरगांव बंदर प्राधिकरणाचे अध्यक्ष ए व्यंकट रमण हांचे सयत गॅमन इंडिया, भौशीक बांदकाम खातें, राष्ट्रीय म्हामार्ग प्राधिकरण बी हांचे अधिकारी आनी सल्लागार हांचे सयत बसका घेतली. हे बसकेंत तांणी ह्या बांदकामाक कळाव कित्याक लागता हाची म्हायती समजून घेतली. लोकांची गैरसोय पयस करपा खातीर जाता तितले बेगीन बांदकाम जावप गरजेचें आशिल्ल्याचें साळकार हांणी स्पश्ट केलें.
ह्या वेळार पुराय जाल्ल्या प्रकल्पाच्या कामांचें सादरीकरण केलें. तेचप्रमाण प्रकल्पाच्या पूर्णत्वाचो रोड मॅप सादर केलो. पावसाक लागून काम थंडाविल्ल्याचें स्पश्ट केलें. तशेंच उड्डाण पूल आनी रोड ओव्हर ब्रीज हे संबंदी म्हायती दिली. मुरगांव बंदरांत वचपी पूल रस्तो आनी रेल्वे मार्ग हांचे वयल्यान वता. ते खातीर लागपी साहित्य विदेशांतल्यान हाडपाची गरज आसा, ते हाडपा खातीर थोडो कळाव लागिल्ल्यान कामाक कळाव जालो अशें अधिकाऱ्यांनी सांगलें.
बायणा ते मुरगांव बंदराक जोडपी पुलाचें काम पूर्ण जाले उपरांत शार वाठारांतल्या अवजड वाहनांची येरदारी दाबोळी, वरुणापुरी, बायणा पुला वयल्यान मुरगांव बंदरांत वळयतले. जेणे करून शार वाठारांतल्या रस्त्यार पडपी ताण उणो जावपाक मजत जातली. हे खातीर ह्या रस्त्याचें बांदकाम बेगीन जावप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
