भांगरभूंय | प्रतिनिधी
म्हापशें: बागा-कळंगूटे गोंय पर्यटन विकास म्हामंडळाच्या वाहन पार्कींग तळार खाजगी हॅलिकॉप्टर देंवयलें. हाका लागून ह्या पार्कींग तळाचें आतां हॅलिपॅडांत रुपांतर जातना दिसून येता. हे खातीर थळाव्यांनी जीटीडीसीच्या कारभाराचेर प्रस्न उपस्थीत केला.
बिरेस्तारा दनपारां हो प्रकार घडलो. हें खाजगी हॅलिकॉप्टर आसून तें पार्कींग तळार देंवोवपा खातीर गरजेची परवानगी घेतिल्ली अशी म्हायती ह्या पार्कींग तळाच्या सुरक्षा मुखेल्यान दिली. पूण हें हॅलिकॉप्टर खंयच्यान आयलें हें मात सांगपाक तांणी न्हयकार दिलो.
ह्या पार्कींग तळा सावन कांय किलोमिटराचेर आग्वाद-सिकेरी हांगा हॅलिकॉप्टर देंवोवपा खातीर खास हॅलिपॅड आसा. अशें आसून लेगीत कसलेंच विशेश अशें कारण नासतना ह्या भौशीक पार्कींग तळार हॅलिकॉप्टर देंवोवपाची परिस्थिती कित्याक निर्माण जाली हाची जाप ह्या सुरक्षा मुखेल्या कडल्यान मेळूंक शकली ना.
आपतकालीन परिस्थिती सोडत जाल्यार अशा भौशीक सुवातेर ते लेगीत भर वस्तींत आनी सरकारी मालमत्तेंत हॅलिकॉप्टर देंवोवपा खातीर परवानगी कशी दिली हे विशीं थळाव्यांनी प्रस्न उपस्थीत केला.
बागा पार्कींग तळार पे पार्कींग शुल्क घेवपा खातीर जीटीडीसी कडल्यान कंत्राटदार एजन्सीची नेमणूक केल्या. हांगा वाहनां पार्कींग करपाची वेवस्था आसा. अशें आसून लेगीत भायले भायर हॅलिपॅडाची निर्मीती केल्ले खातीर थळाव्या लोकांनी निरशेवणी उक्तायली. तशेंच पर्यटन खातें आनी जीटीडीसीचे कार्यपद्दतीचेर दुबाव उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
