बळीश्ट भारता खातीर विविधतायेंतल्यान एकवोट संकल्पना वाडीक लागपाक जाय मेजर जनरल कार्दोजः दोनापावला गाल्फ महोत्सव सुरू

Machan Jatra

भांगरभूंय | प्रतिनिधी

भांगरभूंय । खबरां मेज
पणजीः भारत देश चड बळीश्ट करपा खातीर विविधतायेंतल्यान एकवोट ही संकल्पना देशांतल्या लोकां मदीं वाडपा खातीर यत्न करपाक जाय अशें झुज हिरो मेजर जनरल (निवृत्त) इयान कार्दोज हांणी  बिरेस्तारा सांजे दोनापावलच्या इंटर नॅशनल सेंटरांत आयोजीत केल्ल्या 11व्या गोंय आर्ट आनी लिटरेचर महोत्सवाच्या (गाल्फ) उक्तावण सुवाळ्यांत उलयतना सांगलें.
भारतीय सैन दलांत विविधतायेंतल्यान एकवोट ही संकल्पना प्रत्यक्षांत हाडटात. सैन्यांत एका पाख्या खाला सगल्या धर्मांक मान दितात. दर आयतारा आपूण सगल्यां पयलीं हिंदू देवळाक भेट दितालो ते उपरांत आपल्या धर्माच्या चर्चींत वतालों हाची याद करून दिवंन सैन्यांत हाची शिकवण दिवंन देश बळीश्ट आनी एकवोटीत करपाक जाय अशें तांणी सांगलें. सुमार 80 वर्सां आदीं भुरगेपणात आपल्या कांदोळी गांवाक दिल्ले भेटीची म्हायती तांणी दिली. त्या वेळार पणजी आनी मडगांवात मेर्सडीज टॅक्सी चलताल्यो अशें तांणी सांगलें.
नोबेल पुरस्कार जैतिवंत अर्थतज्ज्ञ अभिजीत बॅनर्जी हांणी 2011 वर्सा जोड लेखक म्हणून बरयल्ल्या  “पूअर इकॉनोमिक्स“ ह्या पुस्तका संबंदी म्हायती दितना आपणे ताचें लेखन गोंयांत केल्लें अशें सांगलें. म्हजे संशोधन पंगडान सात देशांक भेट दिवन लोक जिणेची म्हायती एकठांय केल्या उपरांत हें पुस्कक बरोवपाक घेतिल्लें अशें सांगतना त्या वेळार लोक गोरवां सांबाळ आनी ल्हान वेवसाय करून गिरेस्त जावपाचे यत्न करताले अशें तांणी सांगलें.
ज्ञानपीठ पुरस्कार जैतिवंत दामोदर मावजो हांचो ह्या महोत्सवांत भोवमान केलो. निरुपा नायक हिच्या साहित्याचेर आदारीत कलाकामाचें ह्या वेळार विमोचन तशेंच कोंकणी लेखक, पत्रकार उदय भेंब्रे हांच्या व्हडलें घर ह्या कोंकणी कादंबरीचें प्रकाशन जालें.
हो गाल्फ महोत्सव शेनवार 21 जानेवारी मेरेन चलतलो आनी तो सकाळीं 10 तें साजें 6 मेरेन सगल्याक उक्तो आसतलो.