भांगरभूंय | प्रतिनिधी
कपील काणेः देशांतल्या तंत्रज्ञान क्षेत्रांतली उदरगत तोखणायेची
मडगांवः बऱ्या उत्पादनाच्या निर्मणे खातीर टीमवर्क आसता. जायत्या जाणांच्या यत्नांतल्यान नवनिर्मणी जाता. फक्त बरी संकल्पना आसून जायना. ते संकल्पनेक सत्यांत हाडपा खातीर तुमी कितें यत्न करतात, ताचेर येस निंबून आसता. संयम बाळगून यत्नांतल्या सातत्यांतल्यान नवनिर्मणी जाता, अशें कपील काणे हांणी सांगलें.
मडगांवां गोमंत विद्या निकेतनांत फोमेंतो पुरस्कृत विचारवेध 2024 ह्या व्याख्यानमाळेच्या निमाण्या दिसा कपील काणे हांणी ‘द झेन फिलॉसॉफी ऑफ प्रॉडक्ट डिझायन अँड इनोव्हेट फिअरलेसली’ ह्या विशयाचेर व्याख्यान दिले. व्याख्याना पयलीं राधाकृष्ण नायक हांकां आर्गां ओंपलीं.
काणे हांणी व्याख्याना वेळार जीणप्रवास सांगतनाच अॅपल कंपनींतले तशेंच इंटेल कंपनींतले आपले अणभव सांगलें. टॅक्नोलॉजी क्षेत्रांतल्या नामनेच्या स्टिव्ह जॉब्स तशेंच हेरा वांगडा काम करपाक मेळिल्ल्याचे तांणी सांगलें. बरे प्रॉडक्ट तयार करतना झेन बुद्धीझमाचो वापर कसो करचो हे विशीं सांगतना झेन बुद्दीझमची वळख करून दिली. झेन बुद्दीझमांतल्या 6 तत्वांक पाळो दिल्यार बऱ्या प्रॉडक्टाची निर्मणी जावपाक शकता. झेन म्हणल्यार ध्नान आनी ते संबंदींतली अवस्था. ध्यानांतल्यान आंतरीक भाव, करूणा, विचारांक जागृत करप शक्य आसा. झेन तत्वाज्ञानांतले औदार्य म्हणल्यार दानशीलता, नैतिकतेंतले अनुशासन पाळप, संयम आनी सहनशिलता, सातत्यान यत्न करप, एकाग्रता आनी प्रज्ञा हांचो वापर केल्यार कसलीच गजाल अशक्य नाशिल्ल्याचे तांणी सांगलें.
तंत्रज्ञानान प्रगती केल्ली आसून एआय, चॅटजीपीटी अशा आव्हानांक तोंड दिवचे पडटले. पूण ह्या गजालीं खातीर तांकां इनपुट लेगीत दिवचे पडटले. ते खातीर तांची स्वताची प्रज्ञा आसपाक शकना, हे विसरचे पडटले. मॅकॉनिकल इंजिनिअरींगच्या दुसऱ्या वर्सांत विशय बदलपाचो पर्याय आसता. पूण तो आपणें स्विकारूंक ना. जे तुमकां योग्य दिसता, जातूंत तुमकां आवड आसा तातूंत करियर करात, अशें काणे हांणी सांगलें.
प्रॉडक्टसची निर्मणी ही फक्त संकल्पना तयार करून ती कागदाचेर देंवोवप न्हय, जाल्यार प्रॉडक्टस अस्तित्वांत येमेरेनचो प्रवास आसता. हे प्रक्रियेंत येवपी आडखळी आनी बदल हे स्विकारून सातत्यान काम करचे पडटा. एकाद्या प्रॉडक्ट्स खातीर वेगवेगळे पर्याय उपलब्ध आसचे पडटात. तुमचे कडेन बरी संकल्पना आसून चलचे ना, ताचेर फुडें काम करचें पडटा. एकादे प्रॉडक्ट हे एकल्याच्या हातांत आसपाक शकना. ते खातीर टीमवर्क आसता. तातूंतल्या सगल्या लोकांचे कश्ट ते प्राॅडक्ट तयार करपांत मजत करतात. स्टीव्ह जॉब्स हांणीय आपल्या निमाण्या दिसांत विचारणा केल्ली, जिणेंत बरी गजाल कितें. ताचेर एक बरी टीम तयार केली, जी कार्य फुडें व्हरतली. लोकांक कितें जाय, ते प्रमाण प्रॉडक्ट्सांत बदल गरजेचें आसतात. ते खेरीत मार्केटांत गरज आशिल्ले प्राॅडक्ट तयार करपाचें आव्हान आसता. टॅक्नॉलॉजीक लागून जायत्यो गजाली सोंप्यो जाल्यात, पूण टॅक्नोलाॅजींत व्हड क्रांती जायत आशिल्ल्याचे दिसना. तीच प्राॅडक्ट कांय बदल करून फुडें व्हरतात. फुडारांतल्या गरजांचो नियाळ घेवन ते प्रमाण टॅक्नॉलॉजी काम जावप गरजेचें, पूण तशे जातना दिसना, अशें सांगतनाच हें आपलें वैयक्तीक मत आशिल्ल्याचे काणे हांणी म्हणलें.
गोंयांत बुद्दीवंतांचो उणाव नाः काणे
गोंयांतूय मोट्या प्रमाणांत टॅक्नॉलॉजी क्षेत्रांत संदी आसात. थंयच्या विद्यार्थ्यांनी तांच्या क्षेत्रांत कसल्याच प्रकाराची भिरांत बाळगिनासतना काम करचे. विद्यार्थ्यांक सातत्यान उर्बा दिवपी वातावरण आसचे. नवीन स्टार्टअप, इनक्युबेशन सेंटरा खातीर वाव आसा. तशेंच देशा भायर गेल्ल्या गुणेस्त आनी बुद्दीवंतांक गोंयांत परतून कशें हाडप शक्य आसा, ते खातीर यत्न जाल्यार गोंयच्या उदरगतींत आनीक भर पडटली, अशें मत कपील काणे हांणी उक्तायलें.
भारताचें डिजिटल सयत टॅक्नॉलॉजींत अग्रेसर काम
चीन आनी अमेरिकेंत अर्थीक म्हासत्ते खातीर सर्त आसा. अमेरिका तांचे कडल्यान निर्मीत तंत्रज्ञान चीनाक विक्री करना, जाल्यार चीना कडल्यानूय तांच्या कंपनींक उर्बा घेवन चिप्स, सेमीकंडक्टर निर्मिती करतात. देशांत निर्मित म्हाल खरेदी खातीर निर्बंध आसात. भारता कडल्यानूय डिजिटल टॅक्नॉलॉजी क्षेत्रांत बरी प्रगती फाटल्या कांय वर्सांत दिसून येता. मेक इन इंडिया, स्टार्टअप इंडियाच्या प्रयोगाक लागून नव्याे संकल्पना सत्यांत हाडटना टॅक्नॉजीतली भारताची सध्याची वाड तोखणायेची आसा, अशें कपील काणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
