भांगरभूंय | प्रतिनिधी
साळपें वाठारांत सयांची मोहीम; गांवांत उदकाची समस्या
भांगरभूंय । प्रतिनिधी
म्हापशें: पिळर्ण उद्देगीक वसुकेंतल्या बर्जर बेकर पेंट कंपनीक लागिल्ल्या भिरांकूळ उज्याचे वायट परिणाम कांदोळेच्या साळपें आनी ओड्डा वाड्याचेर दिसपाक लागल्यात. रसायनाक लागून बांयो प्रदुशीत जाल्यात. तातूंत भर म्हूण नळाकूय उदक येनाशिल्ल्यान ह्या वाड्याचेर उदकाचें संकश्ट आयलां. ‘बर्जर हटाव गाव बचाव’ ही घोशणा आतां थळाव्या लोकांनी दिवन हे कंपनीक धांवडावन घालचे खातीर सयांची मोहीम हातांत घेतल्या.
फाटल्या मंगळारा कंपनीक उजो लागून मनीस निर्मीत आपत्ती आयिल्ली. सैमाचें देणें लाबिल्लो साळपे आनी ओड्डा वाडो उद्देगीक उदरगतीच्या नांवा खाला हे पेंट कंपनीक लागून जावपी प्रदुशणा खातीर सडो जावपाचे वाटेर आसा. ह्या प्रदुशणान सगळ्यो शिमो हुपल्यात. कंपनींतल्यान भायर सरपी घातक रसायनाक लागून पर्यावरणाचो तोल हाल्ला.
बर्जर पेंट कंपनीच्या खाला साळपे आनी ओड्डा वाडो आसा. कंपनींतल्यान सोडटात त्या रसायनाक लागून जमनी पोंदचें उदक आनी ह्या वाड्या वयल्यो बांयो प्रदुशीत जाल्यात. बांयच्या उदकाचो इथानोलचो तशेंच थारावीक नेलपॉलिशा सारको वास मारता. ते भायर उदकक फेंस आयिल्लें भशेन दिसता. ह्या उदकान कुडीक जाळ पडटात. ताका लागून हें उदक न्हावपाक लेगीत वापरपाक मेळना. हे दोनूय वाडे सध्या प्रदुशणाच्या चपक्यांत सांपडिल्ल्यान थळाव्यां मदीं हुस्क्याचें वातावरण पातळ्ळां.
सरकारान दुर्घटणाग्रस्त बर्जर पेंट कंपनी परतून सुरू करपाक दिवची न्हय. तशेंच तिचें बेगिनात बेगीन स्थलांतर करचें वा साळपे वाड्याचें कांदोळेच दुसरे कडेन सुरक्षीत सुवातेचेर पुनर्वसन करचें, अशी मागणी थळाव्या लोकांनी केल्या.
17 वर्सां आदीं साळपेच्या लोकांनी हे पेंट कंपनी आड आंदोलन सुरू केल्लें. ती कंपनी दुसरे कडेन व्हरची अशी मागणी त्या वेळार लोकांनी केल्ली. पूण कांय दीस कंपनी बंद दवरून ती परतून सुरू केल्ली. त्या वेळार कंपनी आडच्या लढ्याक जाय तशें येस मेळूंक नाशिल्लें. कंपनींतल्या भुंयगत टांकयांतलें रसायन भुगर्भांत गेल्ल्यान वाड्या वयल्यो बांयो प्रदुशीत जाल्यात. उज्याचे दुर्घटणे उपरांत बांयचे उदक आनीक प्रदुशीत जावन ताका वास मारपाक लागला.
कंपनीक लागिल्ल्या उज्याक लागून थळाव्यांक घरां सोडून दुसरे कडेन आलाशिरो घेवपाचो वेळ आयिल्लो. हे आदीं अशी भिरांकूळ दुर्घटणां आमी केन्नाच पळोवंक नाशिल्ली. ह्या उज्याक लागून आमकां खूब मनस्ताप जाला. हो फक्त ट्रेलर, वायट अणभवाचो पुराय चित्रपट आमकां पळोवपाचो ना. ताका लागून बर्जर पेंट कंपनी हटाव गाव बचाव ही घोशणा चालूच उरतली, अशें साळपे रावपी सुरज नायक आनी गॉडवीन नोरोन्हा हांणी सांगलें. सरकारान ही कंपनी ताकतिकेन दुसरे कडेन व्हरची आनी आमकां शांततायेची जीण जगपाक दिवची. ही मनशान निर्माण केल्ली आपत्ती. ती आमचेर थापली. वाड्या वयलें उदक प्रदुशीत जालां. नळांतल्यानूय उदक येना. ताका लागून सरकारान साळपे खातीर वेगळी पायपलायन घालची, अशें थळावे जोएल अलस्रेडो हांणी सांगलें.
स्थिती हाता भायर गेल्याः सरपंच फर्नांडीस
बर्जर पेंट कंपनी दुसरे कडेन व्हरची. सोमारा हे संबंदांत थळावे लोक साळगांव आनी कळंगूट आमदारा सयत मुख्यमंत्री आनी पर्यावरण मंत्र्याक मेळटले. कंपनीक लागून साळपेच्यो खूबश्यो बांयो प्रदुशीत जाल्यात. ओड्डा वाठाराकूय तिचो मार बसला. फाटल्या कितल्याशाच वर्सां सावन थळावे लोक स्तार सोंसतात. आतां स्थिती हाता भायर गेल्या. हे कंपनीक आमचो खर विरोध आसा, अशें कांदोळीचे सरपंच फर्मिनो फर्नांडीस हांणी सांगलें.
प्रशासकीय अधिकाऱ्यांनी नियाळ घेवचोः मोरजकार
सरकारान कंपनीचो वेव्हार सासणाचो बंद करचो. कंपनीन निर्माण केल्ल्या हवेच्या प्रदुशणाक लागून गांवच्या लोकांक स्वास घेवपाक त्रास जावपाक लागल्यात. कंपनीक लागिल्या उज्याचे वायट परिणाम सध्या गांवांत दिसपाक लागल्यात. प्रशासकीय अधिकाऱ्यांनी घडणुकेचे सुवातेचेर भेट दिवन स्थितीचो नियाळ घेवचो, असो उलो साळपेचे पंच दिनेश मोरजकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
