भांगरभूंय | प्रतिनिधी
इंडीयन प्रिमीयर लिगेंतले (आयपीएल) आयचे दुसरे मॅचींत सनरायझर्स हैदराबादान रॉयल चॅलेंजर्स बंगळुरूक 9 विकेटींनी सहज हारयलो. सनरायझर्स हैदराबादाक जैता खातीर फक्त 69 धांवड्यांची मोख मेळिल्ली. ताणें ती आठवे ओव्हरीत मेळयली. अभिषेक शर्मान 28 बॉलांनी 47 धांवड्यो केल्यो.
ह्या जैता उपरांत सनरायझर्स हैदराबादान गुणतकट्यांत पांचवे वयल्या दुसरे सुवातेर उडी घेतली.जाल्यार बंगळुरू तिसरे वयल्यान चवथे सुवातेर घसरलो.
सनरायझर्सान सेगीत पांचवें जैत जोडलें. सुरवातीच्यो दोन मॅची हारल्या उपरांत ताची जैताची धांव कायम आसा.
ते आदीं टॉस हारल्या उपरांत पयलीं बॅटींग रॉयल चॅलेंजर्स बंगळुरूचो डाव फक्त 68 धांवड्यांचेर सोंपलो. गोंयच्या सुयश प्रभुदेसायान सगल्यांत 15 धांवड्यो केल्यो. जाल्यार विराट कोहली आनी दिनेश कार्तिक हांकां खातें लेगीत उगडपाक जमलें ना. सनरायझर्सा वतीन मार्को येन्सन आनी टी नटराजन हाणें दरेकी तीन विकेटी घेतल्यो.
बंगळुरूचो हो दुसरो उणो स्कोर थारलो. आचे आदीं 2017त कोलकाता नायट रायडर्सा आड ताचो डाव फक्त 49 धांवड्यांचेर सोंपिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
