भांगरभूंय | प्रतिनिधी
इंडीयन प्रिमियर लिगेचे (आयपीएल) 49वे मॅचींत रॉयल चॅलेंजर्स बंगळुरून सध्याचो वस्ताद चेन्नय सुपरकिंग्साक 13 धांवड्यांनी हारयलो. चेन्नय सुपरकिंग्साक जैता खातीर 174 धांवड्यांची मोख मेळिल्ली. पूण, ताका 8 विकेटी वगडावन 160 धांवड्यो करप शक्य जाल्यो. डॅव्हॉन कॉन्वेन 56 धांवड्यांची खेळी केली.
सेगीत तीन हारी उपरांत बंगळुरूचें हें पयलें जैत थारलें. जाल्यार चेन्नय सुपरकिंग्साक सातवे हारीक तोंड दिवचें पडलें.
ते आदीं टॉस हारल्या उपरांत पयलीं बॅटींग करपी रॉयल चॅलेंजर्स बंगळुरूक ओपनरांनी बरी सुरवात करून दिल्ली. विराट कोहली आनी फाफ ड्युप्लेसीस हे जोडयेन पावर प्लेंत पंगडाक 57 धांवड्यो करून दिल्यो. ते उपरांत मोईन अलीन आठवे ओव्हरींत चेन्नय सुपरकिंग्साक पयलें येस मेळोवन दिलें. ताणें ड्युप्लेसिसाक (38) बाद केलो. मुखेलीची विकेट वगडायल्या उपरांत बंगळुरूक दुसरो धपको णववे ओव्हरींत लागलो. ग्लॅन मॅक्सवॅल फक्त तीन धांवड्यो करून धांवबाद जालो.
बरी सुरवात केल्या उपरांत बंगळुरून सेगीत दोन विकेटी वगडायल्या उपरांत कोहली कडल्यान व्हड खेळी करपाची जापसालदारकी आशिल्ली. पूण, तो परतून अपेशी थारलो. 33 बॉलांनी 30 धांवड्यो करून तो मोईन अलीच्या बॉलाचेर बोल्ड जालो.
ते उपरांत महिपाल लोमरोर आनी रजत पाटिदार हांणी पंगडाक सांबाळ्ळो. दोगांयनी मेळून चवथे विकेटी खातीर 44 धांवड्यांची भागिदारी केली. अखेरेक ही जोडी ड्वेन प्रिटोरियसान फोडली. ताणें महिपालाक बाद केलो. ताणें 27 बॉलांनी 42 धांवड्यांची आक्रमक खेळी केली.
19वे ओव्हरींत बंगळुरून तीन विकेटी वगडायल्यो. निमाणे ओव्हरींत दिनेश कार्तिकान 16 धांवड्यो करून पंगडाक सन्मानजनक स्कोर उबारून दिवपाक मजत केली. कार्तिकान 17 बॉलांनी 26 धांवड्यो केल्यो.
चेन्नय सुपरकिंग्सा वतीन महिश थीक्षनान तीन विकेटी घेतल्यो. मोईन अलीन दोन जाल्यार प्रिटोरियसान एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
