भांगरभूंय | प्रतिनिधी
पालिकेक नोटीस जारी करपाचो ग्रामसभेंत थाराव मंजूर
भांगरभूंय । प्रतिनिधी
फोंडें: फोंडें पालिकेन कुर्टी पंचायत वाठारांतलो कोयर उखलपाचें काम बंद केलां. कंत्राटा प्रमाण पंचायत वाठारांतलो सगळो कोयर पालिकेन उखलून ताचो विलो लावप गरजेचें आसा. ते खातीर पंचायतीची जमीन पालिकेक दिल्या. हे संबंदांत पालिकेक नोटीस जारी करून कोयर उखलपाक न्हयकार दिल्यार केरीचो प्रकल्प बंद करपाचो थाराव आयतारा जाल्ले ग्रामसभेंत घेतलो.
खांडेपारा आयतारा जाल्ले ग्रामसभेंत लोकांनी कोयराचो विशय गंभीरपणान घेवन सरपंचाक प्रस्न विचारलो. पंचायतीक कोयर एकठांय करचे खातीर अदीक प्रमाणांत निधी खर्च करचो पडटो. हे आदीं फोंडें पालिकेन जमनी बदला पंचायत वाठारांतलो कोयर उखलपाचें कंत्राट केल्लें. पूण फाटल्या कांय दिसां सावन पालिका पंचायत वाठारांतलो कोयर उखलिना. ताका लागून पंचायतीक अदीक पयशे खर्च करचे पडटात. हे खातीर थळाव्या लोकांनी नाराजी उक्तावन पालिकेक नोटीस जारी करपाच्या थारावा सयत प्रकल्पाचें काम बंद करपाचो थाराव घेतला.
कुर्टी पंचायत वाठारांत हिंदी, मुस्लीम आनी क्रिस्तांव भावां खातीर खास मसुंडी बांदपाचें काम रोखडेच सुरू क रतले. हिंदू भावांक 3 हजार चौखण मिटर, मुस्लीम भावांक 9 हजार चौखण मिटर जाल्यार क्रिस्तांव भावांक 4 हजार चौखण मिटर जमीन दितले. मसुंडे खातीर राखणे वणत दक्षीण गोंयचे खासदार फ्रांसीस सार्दिन हांणी खासदार निधींतल्यान बांदपाचें उतर दिलां.
खांडेपारचे सरपंच नावेद सहसीलदार हांचे अध्यक्षते खाला ग्रामसभा जाली. ह्या वेळार पंचायत मंडळ आनी व्हड संख्येन थळावे लोक हाजीर आशिल्ले.
अमीत शाह हांच्या विधानाचो निशेध
केद्रीय गृहमंत्री अमीत शहा हांणी हुबळी वाठारांत शेनवारा जाल्ले जाहीर बसकेंत म्हादय न्हंये संबंदांत केल्ल्या विधाना खातीर थळाव्या लोकांनी नाराजी उक्तायली. तशेंच त्या विधानाचो निशेध करपाचो थाराव मंजूर करून घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
