भांगरभूंय | प्रतिनिधी
पयल्या टप्प्यांत बीपीएल कुटुंबांक मेळटलो लाव
पणजी : वर्साक तीन फुकट सीलिंडर दिवपी येवजणेचो मसुदो तयार करपाचें काम सुरू आसा. ही येवजण जून सावन सुरू जातली. पयल्या टप्प्यांत दारिद्र्य रेशे सकयल्या (बीपीएल) कुटुंबांक लाव मेळटलो. उपरांत वर्साक 5 लाखा मेरेन येणावळ आशिल्ल्या कुटुंबांक येवजणेचो लाव मेळटलो.
ग्रामीण उदरगत यंत्रणेचे मंत्री गोविंद गावडे हांणी ही म्हायती दिली. गोंयांत 37 हजार बीपीएल कुटुंबा आसा. पयल्या टप्प्यांतत बीपीएल कुटुंबांक येवजणेचो लाव मेळटलो. उपरांत हे येवजणेचो विस्तार जातलो. जांची वर्सुकीं येणावळ 5 लाखां मेरेन आसा, तांकां येवजणेचो लाव दिवपाचे यत्न आसात. येवजणेचे निकश तशेंच हेर अटी तयार करपाचें काम सुरू आसा. येवजण आजून निश्चीत जावंक ना. मसुदाे तयार जाले उपरांत जून सावन येवजणेची अंमलबजावणी सुरू जातली. गरीब तशेंच गरजेवंत लोकांक फुकट सीलिंडर येवजणेचो लाव मेळचो, असो सरकाराचो हेत आसा, अशें मंत्री गोविंद गावडे हांणी सांगलें.
घरगुती गॅस सीलिंडराच्या दरांत कालच्यान परतून वाड जाल्या. ही दरवाड केंद्रीय पांवड्यार जाल्या. संवसारीक बाजारात दर वाडिल्ल्यान सीलिंडराचो दर वाडोवचो पडलो, अशें मंत्री गोविंद गावडे हांणी सांगलें.
वर्साक फुकट तीन सीलींडर दिवपाचें आस्वासन भारतीय जनता पक्षान जाहीरनाम्यांत दिल्लें. सोपूतविधी उपरांतच्या पयल्याच मंत्रीमंडळ बसके उपरांत मुख्यमंत्री डॉ. प्रमोद सावंत हांणी येवजणेक मान्यताय दिल्याचे जाहीर केले. गोंयकारांक तीन सीलिंडर फुकट मेळटले. येवजणेक मान्यताय दिल्याचे तांणी जाहीर केले. फाटल्या सप्तकांत मंत्रीमंडळाची बसका जाली. हे बसकेंत फुकट गॅस सीलिंडरांचो विशय आयलो ना.
हे येवजणेची ग्रामीण उदरगत यंत्रणे वरवीं (आरडीए) अंमलबजावणी करपाचे सरकारान थारायलां. ही येवजण फक्त गरीब लोकां खातीर (बीपीएल कुटुंबा खातीर) लागू करपाचो प्रस्ताव आसा, अशी म्हायती आरडीएंतल्या गोपां कडल्यान मेळ्ळी. हाका लागून सामान्य जनतेचो भ्रमनिरास जाला. विरोधी पक्षांनी लेगीत हाचेर टिका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
