भांगरभूंय | प्रतिनिधी
खबरां संस्था
नवी दिल्लीः संवसारीक फुटबॉल फेडरेशनान (फिफा) भारतीय फुटबॉल फेडरेशनाक बंदीची शिटकावणी दिल्या. तशेंच ऑक्टोबराक जावपी 17 वर्सां सकयल्ले चलल्यांचे संवसारीक फुटबॉल सर्तीचें येजमानपद भारताक वोगडावचें पडपाची शक्यताय आसा.
सर्वोच्च न्यायालयान हालींच फुटबॉल फेडरेशनाक वेंचणूक घेवपाचो आदेश दिल्लो. फेडरेशनाचो कारभार सध्या प्रशासकीय समिती पळयता. हेच समितीन प्रस्तावीत केल्ले कार्यक्रम पत्रिके प्रमाण वेंचणूक घेवपाचो आदेश फाटल्या बुधवारा सर्वोच्च न्यायालयान दिल्लो. भारताच्या येजमानके खाला 11 ऑक्टोबर सावन चलयांची संवसारीक फुटबॉल सर्त सुरू जावपाची आसा. ताच्या पयलीं वेंचणूक घेवपाची येवजण आशिल्ली. वेंचणूक 28 ऑगस्टाक जातली. ताची प्रक्रिया 13 ऑगस्टाच्यान सुरू जावपाची आसा.
सर्वोच्च न्यायालयाचे सुनावणेची प्रत आमकां धाडची अशें फिफान भारतीय फुटबॉल फेडरेशनाक सांगलां. त्रयस्थ यंत्रणेच्या हस्तक्षेपाक लागून फेडरेशनाचेर निंलबनाची कारवाय जावपाक शकता. तशेंच चलयाचें संवसारीक फुटबॉल सर्तीचें येजमानपद लेगीत वचपाक शकता अशी म्हायती फेडरेशनाचो सरचिटणीस सुनंदो धर हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
