भांगरभूंय | प्रतिनिधी
भांगरभूंय I प्रतिनिधी
पणजी : आदले मुख्यमंत्री स. मनोहर पर्रीकार हांणी फुटबॉलाक राज्य खेळाचो दर्जो मेळोवन दिलाे म्हूण केंद्रांतल्या फुडाऱ्यांनी बायलां फुटबॉल विश्व करंडका खातीर गोंयचें नांव फुडें केले. फुटबॉलांत देशांत गोंय सरस आसा, अशें मुख्यमंत्री डॉ. प्रमोद सावंत हांणी म्हणलें.
सोमारा ताळगांवच्या डॉ. श्यामा प्रसाद मुखर्जी स्टेडियमाचेर फिफा 17 वर्सां सकयल्या बायलां फुटबॉल विश्व करंडक सर्तीचें उक्तावण मुख्यमंत्री डॉ. प्रमोद सावंत हांचे उपस्थितींत जाले. ह्या वेळार तांचे वांगडा खेळां मंत्री गोविंद गावडे, मुख्य सचीव पुनीत कुमार गोयल, अखील भारतीय फुटबाॅल फेडरेशनाची वांगडी वालंका आलेमांव, गोंय खेळां प्राधिकरणाचे संचालक अजय गावडे हाजीर आशिल्ले.
फुटबॉलाक राज्य खेळाची वळख करून दिले उपरांत पर्रीकार हांणी गोंय फुटबॉल डेव्हलोपमेंट कावंसील सुरू केले. हे खाला राज्यांतल्या दरेक म्हालांत मेळून 6 ते 14 पिराय गटांतल्या विद्यार्थ्यां खातीर सुमार 30 केंद्रां सुरू केली. तशेंच ह्या खेळाची उदरगत जावची हे खातीर गोंय फुटबॉल संघटणेक लेगीत तेंको दिवन युवा खेळगडे घडोवपाचेर भर दिलो. जीएफडीसीचे अध्यक्ष तशेंच आदले भारतीय फुटबॉल खेळगडे पद्मश्री ब्रह्मानंद शंखवाळकार, सागचे प्रशिक्षण संचालक ब्रुनो कुतिन्हो सारक्या खेळगड्यांनी गोंयचें नांव संवसारभर पर्जळीत केले, अशें मुख्यमंत्री हांणी म्हणलें.
उक्तावण सुवाळ्याक नामनेच्यो गायिका हेमा सरदेसाय, सोनिया सिरसाट हांच्या गायनान रंगत आयली. ह्या वेळार गोंयचे सांस्कृतीक दर्शन घडोवपी कार्यावळी सादर जाल्यो.
काय कारणांक लागून केंद्रीय खेळां मंत्री अनुरासिंग ठाकूर हाजीर रावंक ना. ह्या वेळार मुख्यमंत्री डॉ. सावंत हांचे हस्तुकीं पद्मश्री ब्रह्मानंद शेखवाळकार आनी ब्रुनो कुतिन्हो हांचो भोवमान केलो.
हे कार्यावळीक मंत्री सुभाष फळदेसाय, उपसभापती जाेशुआ डिसोझा, आमदार दाजी साळकार, प्रवीण आर्लेकार, प्रेमेंद्र शेट, डॉ. चंद्रकांत शेट्ये तशेंच हेर आदले मंत्री हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
