भांगरभूंय | प्रतिनिधी
60 शिक्षण संस्थांचेर कारवाय करची, बाल हक्क आयोगाचें येरादारी खात्याक पत्र
भांगरभूंय I प्रतिनिधी
पणजी : राज्यांतल्या 419 शिक्षण संस्थांतल्या 60 बालरथांक वाहन फिटनेस प्रमाणपत्र नासतना विद्यार्थ्यांची येरादारी करतात. विद्यार्थ्यांचे सुरक्षे कडेन तडजोड करपी ह्या 60 बालरथां कडेन संबंदीत शिक्षण संस्थांचेर बेगोबेग कारवाय करात, अशें निर्देश बाल हक्क आयोगान येरादारी खात्याक दिल्यात.
आयोगाचे अध्यक्ष पिटर बॉर्जीस हांणीच हालीच येरादारी खात्याक पत्र बरोवन 419 शिक्षण संस्थांतल्या 60 बालरथ येरादारीचे फिटनेस प्रमाणपत्रांचे नुतनीकरण करूंक ना. फिटनेस प्रमाणपत्रा बगर हे बालरथ विद्यार्थ्यांची येरादारी करतात. बालरथांच्या फिटनेसा विशीं 28 ऑगस्टाक जाहीर जाल्ल्या अहवालांतल्यान ही गजाल मुखार आयल्या. मोटार वाहन कायद्या प्रमाण बालरथ वाहनां प्रवासी वाहनांत येतात. ताका लागून बालरथ रस्त्यांचेर हाडटना तांचे कडेन सगले परवाने आसप गरजेचें, अशें बार्जीस हांणी पत्रांत नमूद केलां.
बालरथांचेर नियंत्रण दवरपाक दरेक शाळेन मुख्याध्यापक वा प्राचार्यांच्या अध्यक्षते खाला बाल येरादारी कमिटीची स्थापणूक करची, अशें निर्देश आयोगान हाचे पयलीच दिल्यात. ही कमिटी विद्यार्थ्यांची सुरक्षा, बसस्टॉप, बालरथांचें शुल्क निश्चीत करतलें. ते भायर बालरथांच्या नोंदणी, फिटनेस, प्रदुशण नियंत्रण प्रमाणपत्र, बालरथ चालकाचो परवानो, मुळावे उपचार कीट हे संबंदीचीं कागदपत्रांची पडटाळणी करतली.
हे कमिटींत पालक-शिक्षक संघटणा, बस धनी तशेंच संबंदीत क्षेत्रांतले पुलीस, येरादारी, शिक्षण खात्याचे निरिक्षक आनी थळावे हांचो आस्पाव आसतलो. हे कमिटीन दर तीन म्हयन्यांनी बसका घेवन बालरथांच्या फिटनेस तशेंच हेर गजालींची पडटाळणी करची, अशेंय आयोगान जाहीर केल्ल्याचे येरादारी खात्याच्या निदर्शनाक हाडून दिलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
