भांगरभूंय | प्रतिनिधी
गोंय खंडपिठांत याचिका दाखल; सुनावणी 27 एप्रीलाक
पणजी: फोंडें आनी कुळें वाठारांतल्या फार्म आनी रिसॉर्टांत हती बंदिस्त दवरून तांचो वेवसायीक उपेग जाता. तेच बरोबर तांची वेवस्थीत देखभाल जायनाशिल्ल्यान तांकां गंभीर समस्यांक तोंड दिवचें पडत आशिल्ल्याचो मुद्दो उपस्थीत करून मुंबय उच्च न्यायालयाच्या गोंय खंडपिठांत याचिका दाखल केल्या. ह्या प्रकरणाची सुनावणी 27 एप्रीलाक जातली.
ह्या प्रकरणांत पयलीं 2020 वर्सा पिपल्स फॉर अॅनिमल ह्या बिगर सरकारी संस्थेन खंडपिठांत जनहीत याचिका दाखल केल्ली. त्या वेळार रान विभागाचे प्रधान मुख्य संरक्षक, गोंय रानजीव मंडळाचे वांगडी सचीव, गोंयचे मुखेल सचीव, कुळेंचे जंगल बूक रिसॉर्ट आनी सह्याद्री स्पायस फार्म, फोंडेंचे सहकारी स्पायस फार्म आनी ट्रॉपिकल स्पायस फार्म हांकां प्रतिवादी केल्ले.
ते याचिकेची दखल घेवन खंडपिठान 2 नोव्हेंबर 2020 दिसा ज्येश्ठ संशोधक डॉ. सुरेंद्र वर्मा हांची समिती स्थापन करून संबंदीत रिसॉर्टाची पळोवणी करून अहवाल सादर करपाचो आदेश दिवन याचिका निकालांत काडिल्ली. उपरांत डॉ. वर्मा हांणी दोन संशोधन सहाय्यक आनी एक वरिश्ठ गोरवां वैजकी तज्ञ घेवन 9 ते 11 डिसेंबर 2020 दिसा त्या रिसॉर्टांतल्या हतयांची पळोवणी करून रान विभागाक अहवाल सादर केलो. तातूंत समितीन हतयांक बर्यो सुविधा दिवपाची तशेंच तांचे भलायके खातीर कांय सुचोवणी केल्ल्यो. उपरांत थळाव्यां कडल्यान हतयाच्या देखभाली विशीं म्हायती मेळ्ळे उपरांत याचिकादारान हे विशीं रान विभागाचे प्रधान मुख्य संरक्षका कडेन 11 जानेवारी 2022 दिसा कागाळ दाखल केल्ली.
संबंदीत रिसॉर्टांची पळोवणी केले उपरांत ताची वेवसायीक तशेंच तांकां बऱ्यो सुविधा नाशिल्ल्याचें मुखार आयलें. हाची दखल घेवन याचिकादारान खंडपिठांत परतून नवी जनहीत याचिका दाखल करून वयलो मुद्दो उपस्थीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
