भांगरभूंय | प्रतिनिधी
प्राधिकरणाचें मुख्यालय पणजेंत करपाची मागणी
पणजी : म्हादय उदक वेवस्थापन प्राधिकरण स्थापन केले उपरांत गोंयच्यो खूबश्यो आडमेळीं पयस जातल्यो. प्राधिकरणाचे मुख्यालय पणजेंत स्थापन करपाची मागणी गोंय सरकारान केल्या. अॅडव्होकेट जनरल देविदास पांगम हांणी म्हादयचेर उलयतना ही म्हायती दिली.
म्हादयचें उदक कर्नाटकान घुंवडावपाक जायना म्हूण गोंय सरकाराचे नेटाचे यत्न सुरू आसात. म्हादय उदक वेवस्थापन प्राधिकरण बेगिनात बेगीन स्थापन करपाची मागणी आसा. म्हादय उदक वेवस्थापन प्राधिकरण स्थापन जालें काय गोंयच्या मार्गातल्यो खूबशो आडमेळीं पयस जातल्यो. प्राधिकरणाचेर गोंय, महाराष्ट्र आनी कर्नाटकाचो दरेकी एक वांगडी आसतलो. ते भायर केंद्र सरकाराचे तीन वांगडी आसतले. प्राधिकरणाचें मुख्यालय दिल्लीत स्थापन करपाचो प्रस्ताव आशिल्लो. म्हादयचें चडशें पात्र गोंयांत आसा. हाका लागून मुख्यालय पणजेंत आसचें अशी मागणी गोंय सरकारान केंद्रीय जलशक्ती मंत्रालया कडेन केल्या.
कर्नाटकाच्या डीपीआराक केंद्रान मान्यताय दिल्ली आसली तरी कायद्या प्रमाण उदक घुंवडावपाक कर्नाटक सरकाराक मेळना. कायदो हे विशीं स्पश्ट आसा. कसलोय परिणाम जावं वा ना जावं अभयारण्य वाठारांतलें उदक घुंवडावपाक मेळना. रानजीव कायद्य खाला कर्नाटकाक नोटीस जारी जाल्या. हाका लागून सर्वोच्च न्यायालयांत गोंयची बाजू भक्कम आसा अशें अॅडव्होकेट जनरल देविदास पांगम हांणी सांगलें.
म्हादयचो तंटो सुटावो जावपा खातीर 2010 वर्सा म्हादय लवादाची स्थापणूक जाली. लवाद स्थापन जावपाचो निर्णय गोंया खातीर योग्य आशिल्लो. लवाद स्थापन जावंक नाशिल्लो जाल्यार कर्नाटक गोंयाक कसलीच कल्पना दिनासतना म्हादयचें उदक घुंवडायतलें आशिल्लें. तशेंच लवादान जो निवाडो दिला ताका गोंय सरकारान सर्वोच्च न्यायालयांत आव्हान दिलां. लवादाचो निवाडो गोंय सरकारान मान्य करूंक ना. सर्वोच्च न्यायालयांत गोंयची बाजू भक्कम आसा. पुराय तरेन अभ्यास करून गोंय सरकार बाजू मांडटलें अशें अॅडव्होकेट जनरल अॅड. देविदास पांगम हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
