प्रस्नमंजुशा सर्तींत श्री भुमिका उच्च माध्यमीक विद्यालय पयलें

प्रस्नमंजुशा सर्तीच्या जैतिवंतां वांगडा संजीव वेरेंकार, आशा नायक, समीर प्रभू आनी हेर. (राघोबा पेडणेंकार)

भांगरभूंय | प्रतिनिधी

केरी-सत्तरी: कोंकणी सेवा केंद्र सांखळे आनी सरकारी उच्च माध्यमीक विद्यालय सांखळे हांच्या जोड पालवान कोंकणी राजभास दिसा निमतान प्रस्नमंजुषा सर्तीचें आयोजन केल्लें. 

हे सर्तीच्या उक्तावणाक नामनेची समीक्षक प्रा. डॉ. किरण बुडकुले, मुखेल सोयरे म्हणून नामनेचे कवी, लेखक आनी पत्रकार संजीव वेरेंकार हाजीर आशिल्ले. विद्यालयाची प्राचार्य आशा नायक, उपप्राचार्य बिना च्यारी, कोंकणी सेवा केंद्राची अध्यक्ष सिद्धी प्रभू पोरोब आनी प्रस्नमंजुषा सर्तीचे मुखेली शिक्षक समीर आत्मा प्रभू तशेेंच हेर मानेस्त हाजीर आशिल्ले. 

ह्या वेळार प्रा. किरण बुडकुले हांचे हस्तुकीं संजीव वेरेंकार हांचो तांच्या कार्या खातीर शाल, श्रीफळ आनी यादस्तीक भेटोवन भोवमान केलो. 

डॉ. बुडकुले हांणी, प्रस्न मंजुशेक लागून विद्यार्थ्यांचें राजकीय, समाजीक, सांस्कृतीक ज्ञान वाडटा. प्रस्न मंजुशेची बरी कार्यावळ आयोजीत केल्ले खातीर तांणी संस्थेक परबीं भेटयलीं. 

संजीव वेरेंकार हांणी कोकणी ही राजभास जाल्ल्याचो इतिहास भुरग्यां मुखार मांडलो. 

प्रश्नमंजुषा सर्तीचें पयलें इनाम श्री भुमिका उच्च माध्यमीक विद्यालय पर्यें-सत्तरी, दुसरें शांतादुर्गा उच्च माध्यमीक विद्यालय, दिवचल, तिसरें होंडा उच्च माध्यमीक विद्यालय होंडा-सत्तरी हांकां फावो जालें. सर्तींत वट्ट 11 विद्यालयांनी वांटो घेतलो. 

हे कार्यावळीचें संचालन आदिती शेट्टी आनी समिक्षा शिरोडकार हांणी केलें. समिक्षा शिरोडकार हांणी उपकार मानले. कार्यावळीच्या आयोजनांत सरकारी उच्च माध्यमीक विद्यालय सांखळेचे प्राचार्य, शिक्षक आनी शिक्षकेत्तर कर्मचार्‍यांनी सेवा केंद्राक खूब सहकार्य केलें.