प्रशासन तुमच्या दारांत

भांगरभूंय | प्रतिनिधी

मंत्री आयकतले लोकांचीं गाराणीं

भांगरभूंय I प्रतिनिधी
पणजी : मुख्यमंत्री डॉ. प्रमोद सावंंत हांच्या सरकाराक चार वर्सां पुराय जाल्ले निमतान गोंयांत ‘प्रशासन तुमच्या दारांत’ कार्यावळ जातली. येत्या 17 आनी 18 मार्चाक उपजिल्होधिकारी हांच्या कार्यालयांत ही कार्यावळ जातली. मंत्री आनी आयएएस अधिकारी कार्यावळींत लोकांची गाराणी आयकतलें, अशें मुख्यमंत्री डॉ. प्रमोद सावंत हांणी सांगलें.

प्रधानमंत्री नरेंद्र मोदी हांच्या सरकाराक 9 वर्सा आनी डॉ. प्रमोद सावंत सरकाराची 4 वर्सां पुराय जाल्ले निमतान ही कार्यावळ जातली. मुख्यमंत्री डॉ. प्रमोद सावंत हांचे फुडारपणा खाला गोंय मंत्रीमंडळाचे बसके उपरांत घेतिल्ले पत्रकार परिशदेंत मुख्यमंत्री डॉ. प्रमोद सावंत हांणी ही म्हायती दिली.
पुराभिलेख खात्याचो फांटो आशिल्ले गोवा गॅझेटर हे आतां स्वतंत्र खातें जातलें. स्वतंत्र खात्याक मंत्रीमंडळान मान्यताय दिल्या. गोवा गॅझेटर अॅन्ड हीस्टोरिकल रेकॉर्ड अशें खात्याचें नांव आसतलें. नव्या खात्यांत संशोधनाचो वावर चलतलो.
केंद्राच्या टेलिकॉम धोरणाक
मान्यताय
केंद्रीय येवजण्यांचो लाव घेवपा खातीर राज्य सरकारान केंद्राच्या टेलिकॉम (दुरसंचार) धोरणाक मान्यताय दिल्या. भाड्याच्या शुल्कांतल्यान थाकाय मेळपा खातीर हो निर्णय जाला.
जी-20 शिखर परिशदेच्यो 8 बसका गोंयांत जातल्यो. 17 ते 19 एप्रील मेरेन पयलीं बसका जातली. ताज कन्व्हेंशन आनी ग्रँड हयात हॉटेलांत ही बसका जातली. हेर बसका जून आनी जुलय म्हयन्यांत जातल्यो. जी-20 बसके पयलीं स्मार्ट सीटीचीं कामां पुराय करपाचो यत्न आसा, अशें मुख्यमंत्री डॉ. सावंत हांणी सांगलें.

म्हाला प्रमाण मंत्र्यांची नेमणूक

केपें – मुख्यमंत्री डॉ. प्रमोद सावंत
सांगें – विश्वजीत राणे
सत्तरी – मॉवीन गुदिन्हो
तिसवाडी – रवी नायक
काणकोण – निलेश काब्राल
पेडणें – सुभाष शिरोडकार
साश्ट – रोहन खंवटे
मुरगांव – गोविंद गावडे
फोंडें – बाबुश मोंसेरात
बार्देस – सुदिन ढवळीकार
धारबांदोडें – निळकंठ हळर्णकार
दिवचल – सुभाष फळदेसाय.

सुटके झुजाऱ्यांच्या भुरग्यांक नोकरीः येवजणेक
वर्साची मुजतवाड
गोंय मुक्ती लड्यांत वांटेकार जाल्ल्या सुटके झुजाऱ्यांच्या भुरग्यांक नोकरी दिवपी येवजणेक मंत्रीमंडळाचे बसकेंत एक वर्साची मुजतवाड दिल्या. हे येवजणेक दिल्ली ही निमाणी मुजतवाड आसा. आतां फक्त 90 पात्र भुरगे उरल्यात. हांवे मुख्यमंत्रीपदाचो ताबो घेतले उपरांत 270 जाणांक येवजणे खाला नोकऱ्यो दिल्यात. ताचे पयलीं 250 नोकऱ्यो सुटके झुजाऱ्यांच्या भुरग्यांक मेळ्ळ्यात.