प्रशासनांत व्हड बदल

भांगरभूंय | प्रतिनिधी

बदल्यांचें सत्र सुरूच, अानीक 31 अधिकाऱ्यांच्यो बदल्यो

पणजी : आयएएस अधिकारी मायकल डिसोझा तशेंच संजीव गडकर हांचे सयत 15 अधिकाऱ्यांच्या बदल्यो केले उपरांत बुधवारा आनीक 31 अधिकाऱ्यांच्यो बदल्यो जाल्यात. तीन दिसांत वट्ट 48 अधिकाऱ्यांच्यो बदल्यो जाल्यात. शिक्षण संचालक भूषण सावयकार हांची बदली करतनाच शिक्षण खात्याचे उपसंचालक शैलेश जिंगडे हांचे कडेन शिक्षण संचालकपदाचो तात्पुरतो ताबो दिला. हाका लागून सध्या पुराय वेळ शिक्षण संचालक ना.

सगल्या खात्यांच्या मुखेल अधिकाऱ्यांच्यो बदल्यो तीन दिसांत जाल्यात. सरकाराचो सोपूतविधी जाले उपरांत प्रशासनांतल्या अधिकाऱ्यांच्यो बदल्यो जायत आसात. ह्या बदल्यांक लागून प्रशासनांतल्या विवीध फाट्यांचे मुखेल अधिकारी बदल्ल्यात. नव्या मंत्र्यांच्या इत्से प्रमाण हे बदल जाल्ल्याची चर्चा आसा. आयएएस अधिकाऱ्यां सयत वरिश्ठ श्रेणी अधिकारी तशेंच कनिश्ठ श्रेणी अधिकाऱ्यांच्यो बदल्यो जाल्यात.
मामलेदार तशेंच जिल्होधिकारी कार्यालयातले कर्मचारी आनी अधिकाऱ्यांच्यो बदल्यो जातल्यो, अशें महसूल मंत्री बाबूश मोंसेरात हांणी कांय दिसां पयलीं सांगिल्लें. ते प्रमाण सगल्या उपजिल्होधिकाऱ्यांच्यो बदल्यो जाल्यात. सगल्या म्हामंडळाच्या वेवस्थापकी संचालकांच्यो लेगीत बदल्यो जाल्यात.
धावी तशेंच बारावीचे निकाल लागले उपरांत नवे शिक्षणीक वर्स सुरू जावपाचे आसा. हे वर्स सुरू जावचे पयलीं शिक्षण संचालक भूषण सावयकार हांची बदली जाल्या. म्हायती आयोगाच्या सचीव पदाचेर तांची बदली जाल्या. शिक्षण खात्यांत उपसंचालक आशिल्ले शैलेश जिंगडे हांचे कडेन संचालकपदाचो तात्पुरतो ताबो दिला. हे विशींचो स्वतंत्र आदेश जारी जाला. तशेंच प्रवीण वळवटकार हांची म्हायती तंत्रज्ञान खात्याच्या संचालकपदार नेमणूक जाल्या.
श्रीनेत कोठावळे, माया पेडणेंकार, वेनांसियो फुर्तादो, शशांक ठाकूर, अजय गावडे ह्या म्हत्वाच्या अधिकाऱ्यांची बदली सोमारा जाली. हाचे उपरांत बुधवारा श्रीपाद आर्लेकार, डॉ. गीता नागवेंकार, पुंडलीक खोर्जुवेंकार, क्लेन मदेरा, महादेव आरोंदेकार, अजीत पंचवाडकार ह्या अधिकाऱ्यांच्यो बदल्यो जाल्यात.
श्रीपाद आर्लेकार डॉ. गीता नागवेंकार, तुषार हळर्णकार, क्लेन मदेरा, रोहीत कदम, नेहा नायक पानवेलकार, दीपेश प्रियोळकार, पुंड​लीक खोर्जुवेंकार, विशांत नायक गावणेंकार, चंद्रेश कुंकळकार, स्नेहल नायक गोलतेकार, आग्नेलो फर्नांडीस, भूषण सावयकार, महादेव आरोंदेकार, अजीत पंचवाडकार, संगीता नायक ह्या वरीश्ठ नागरी सेवा अधिकाऱ्यांच्यो बदल्यो जाल्यात.
तशेंच रमेश गांवकार, राजेश आजगांवकार, उदय प्रभुदेसाय, विवेक नायक, सपना बांदोडकार, शैला भोसले, रोशेल फर्नांडीस, गिरिश सावंत, शुभम नायक, रोहन कासकार, इशांत सावंत, गणेश बर्वे, मधू नार्वेकार ह्या 13 कनिश्ठ श्रेणी अधिकाऱ्यांच्यो बदल्यो जाल्यात.

वरीश्ठ श्रेणी अधिकाऱ्यांचीं नवीं पदां

रोहिदास कदम, मुख्याधिकारी- मडगांव
श्रीपाद आर्लेकार, भलायकी संचालक (प्रशासन)
डॉ. गीता नागवेंकार, पिडब्ल्यूडी- प्रशासन संचालक
तुषार हळर्णकार, जोड सचीव (गृह)
क्लेन मदेरा, सचीव- गोंय पुनर्वसन मंडळ
नेहा नायक पानवेलकार, एमडी- घरनिर्माण मंडळ
दीपेश प्रियोळकार, वांगडी सचीव- फुटबॉल विकास म्हामंडळ
पुंडलीक खोर्जुवेंकार, म्युझियम संचालक
विशांत नायक गावणेंकार, एमडी- शिक्षण उदरगत म्हामंडळ
चंद्रेश कुंकळकार, अतिरिक्त कर आयुक्त
स्नेहल नायक गोलतेकार, विज्ञान, तंत्रज्ञान संचालक
आग्नेलो फर्नांडीस, वांगडी सचीव- राज्य मागास आयोग
भूषण सावयकार, सचीव- म्हायती आयोग
महादेव आरोंदेकार, एसएलओ- जीएसआयडीसी
अजीत पंचवाडकार, एमडी- अल्पसंख्याक वित्त म्हामंडळ
संगिता नायक, वांगडी सचीव- राज्य महिला आयोग

कनिश्ठ श्रेणी अधिकाऱ्यांचीं नवीं पदां

रमेश गांवकार, उपजिल्होधिकारी- काणकोण
राजेश आजगांवकार, उपजिल्होधिकारी- दक्षीण गोंय
उदय प्रभुदेसाय, उपजिल्होधिकारी- साश्ट
विवेक नायक, उपजिल्होधिकारी- तिसवाडी
सपना बांदोडकार, उपसंचालक- गोरवां सांबाळ खातें
शैला भोसले, अवर सचीव (प्रशासन)
रोशेल फर्नांडीस, उपसंचालक (खण)
गिरीश सावंत, अवर सचीव (महसूल)
शुभम नायक अवर सचीव (महसूल 2)
रोहन कासकार, उपजिल्होधिकारी- पेडणें
इशांत सावंत, अवर सचीव (कार्मीक खातें)
गणेश बर्वे, उपसंचालक- नगरपालिका प्रशासन
मधू नार्वेकार, काणकोण पालिका मुख्याधिकारी