भांगरभूंय | प्रतिनिधी
पणजीः केंद्र सरकारान फाटल्या 10 वर्सांत गोंयांत केल्लीं उदरगतीचीं कामां 6 फेब्रुवारीक मडगांवां जावपी सभेंत प्रधानमंत्री नरेंद्र मोदी हांचे मुखार मांडटले, अशें मुख्यमंत्री डॉ. प्रमोद सावंत हांणी बुधवारा पत्रकारां कडेन उलयतना सांगलें.
प्रधानमंत्री मोदी हांचे सभेचे फाटभुंयेर मुख्यमंत्री डॉ. सावंत हांणी बुधवारा मंत्रालयांत संबंदीत खात्यांच्या अधिकाऱ्यांची बसका घेतली. हे बसके उपरांत मुख्यमंत्री पत्रकारां कडेन उलयताले.
प्रधानमंत्री मोदी हांची मडगांवांतली सभा सरकारी आसा. विकसीत भारत- 2047 खातीर केंद्र सरकारान उबारिल्लीं पावलां, घेतिल्ले निर्णय हाचेर हे सभेंत प्रधानमंत्री उलयताले. प्रधानमंत्री मोदी हांच्या फुडारपणा खालच्या केंद्र सरकारान फाटल्या 10 वर्सांत गोंयचे उदरगती खातीर घसघशीत निधी दिला. ह्या निधीचो वापर करून गोंय सरकारान विवीध मळांचेर दर्जेदार साधनसुविधा उबारून गोंयची सर्वांगी उदरगत करचो यत्न चालू दवरला. ह्याच कामांचो अहवाल आपूण 6 फेब्रुवारीचे सभेंत प्रधानमंत्री मोदी मुखार दवरतलों, अशें मुख्यमंत्र्यान सांगलें. मजगतीं, 6 फेब्रुवारीक बेतलांत जावपी राष्ट्रीय उर्जा सुरक्षा सप्तकाच्या उक्तावण सुवाळयाक प्रधानमंत्री मोदी हाजीर रावतले. हे कार्यावळी उपरांत तांची मडगांवां सरकारी सभा जातली. हे सभेची प्रदेश भाजपा कडल्यान नेटान तयारी चल्ल्या. सभेक गोंयभरांतल्यान 50 हजारां परस चड लोक येवचे, हे खातीर मंत्री, भाजपा आमदार, फुडारी, पदाधिकारी आनी कार्यकर्ते नेटान वावराक लागल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
