भांगरभूंय | प्रतिनिधी
शशांक ठाकूरः जमीन प्रस्नांक लागून आडखळ
भांगरभूंय । प्रतिनिधी
पणजीः केंद्र सरकारा कडल्यान चालीक लायिल्ल्या प्रधानमंत्री ग्रामीण आवास येवजणे खाला गोंयांतल्या फक्त 36 टक्के लाबार्थ्यांच्या घरांचें काम पुराय जालां. केंद्र सरकारान मुख्य 13 येवजण्यांच्या सगळ्या राज्यांतल्या स्थिती संबंदांत सादर केल्ल्या अहवालांत ही म्हायती मुखार आयल्या. गोंयांतल्या जमीन प्रस्नांक लागून खूब जाणांक हे येवजणेचो लाव अजून घेवपाक मेळूंक ना, अशें ग्रामविकास खात्याचे संचालक शशांक ठाकूर हांणी प्रतिनिधी कडेन उलयतना सांगलें.
प्रधानमंत्री ग्रामीण आवास येवजणे खाला अर्थीक नदरेन दुबळे आशिल्ल्या लोकांक तांच्या घराचे दुरुस्तीकामा खातीर वा बांदकामा खातीर अर्थीक मदत दितात. दोंगराळ वाठारांतल्या लोकांक 1 लाख 30 हजार आनी सपाट जमनीचेर आशिल्ल्या लोकांक 1 लाख 20 हजार रुपयां सरकारा वतीन दितात.
गोंयांत ग्रामविकास मंत्रालया वतीन 1,707 घरांचें बांदकाम करपाची मोख दवरिल्ली. ते खातीर केंद्रा कडल्यान 1444.1731 लाख जाल्यार राज्य सरकारा कडल्यान 948.1154 लाख रुपयांची तजवीज केल्ली. मजगतीं, राज्या कडेन 676.624 लाख रुपया उपलब्ध आसात. तातूंतले फक्त 63.3 लाख रुपया निधी हस्तांतरण आदेशा प्रमाण दिल्यात. उरिल्ले 613.324 लाख रुपया राज्याचे तिजोरेंत बाकी उरल्यात.
प्रधानमंत्री आवास येवजणे खातीर वट्ट 269 लाख लोकांनी येवजणे खातीर नोंदणी केल्ली. तातूंतल्या 243 लोकांची भुगोलीक म्हायतीचे पडताळीणीच्या आदारान निवड जाली. तातूंतल्या पयल्या टप्प्यांत 232 जाणांक जाल्यार दुसऱ्या टप्प्यांत 168 जाणांक, तशेंच तिसऱ्या टप्प्यांत 148 जाणांक निधी दिलो. तातूंतल्या 138 घरांचें काम आयज मेरेन पुराय जालां.
ठाकूर हांणी प्रतिनिधी कडेन उलयतना सांगलें, गोंयांत अनुसुचीत जाती, अनुसुचीत जमाती हांचे खातीर अटल आवास येवजणे सारक्यो येवजण्यो चालीक लायतात. हे येवजणे खाला लोकांक सुमार 2 लाखांचो निधी दितात. ताका लागून खूबशे लोक राज्य सरकाराचे येवजणेचो लाव घेतात. एके येवजणेचो लाव घेतिल्ल्या नागरिकाक परतूच त्याच कारणा खातीर दुसरे येवजणेचो लाव घेवपाक मेळना. ताका लागून कांय प्रमाणांत प्रधानमंत्री आवास येवजणेचे लाबार्थी उणे जाल्यात.
प्रधानमंत्री आवास येवजणेचो लाव घेवचे खातीर खूब जाणां कडेन स्वताचे मालकीची जमीन ना. जांचे कडेन जमीन आसा तांचे कडेन ना हरकत दाखलो ना. ताका लागून खूब जाणांक लाव घेवपाक मेळूंक ना. मात बेगिनात बेगीन चडांत चड लोकांक लाव दिवपाचो विभागाचो यत्न आसा.
संचालक, ग्रामविकास खातें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
