प्रतापसिंह राणे उपरांत डॉ. प्रमोद सावंत चड काळ मुख्यमंत्रीपदार अाशिल्ले फुडारी

भांगरभूंय | प्रतिनिधी

पणजी: गोंय घटक राज्य जाले उपरांत डॉ. प्रमोद सावंत हे प्रतापसिंह राणे उपरांत मुख्यमंत्रीपदार चड काळ आशिल्ले फुडारी थारल्यात. डॉ. प्रमोद सावंत हांणी मुख्यमंत्रीपदाची 4 वर्सां आनी 317 दीस पुराय केल्यात.30 मे 1987 हे दिसा गोंयाक घटक राज्याचो दर्जो मेळ्ळो. गोंयांक घटक राज्य जाल्ले तेन्ना प्रतापसिंह राणे मुख्यमंत्री आशिल्ले. 1989 च्या विधानसभा वेंचणुके उपरांत राणे परतून मुख्यमंत्री जाले. 27 मार्च 1990 मेरेन ते मुख्यमंंत्री आशिल्ले. 1994 च्या विधानसभा वेंचणुके उपरांत प्रतापसिंंह राणे परत मुख्यमंत्री जाले. 1998 मेरेन ते मुख्यमंत्री आशिल्ले. सर्गेस्त मनोहर पर्रीकार हांचे सरकार कोसळ्ळें उपरांत 7 जून 2005 ते 7 जून 2007 ह्या काळांत प्रतापसिंह राणे परत मुख्यमंत्री आशिल्ले. घटक राज्य जाले उपरांत सगळ्यांत चड तेप खाशानीच मुख्यमंत्रीपद भुशयलां.

मनोहर पर्रीकार हांच्या मरणा उपरांत 19 मार्च 2019 हे दिसा डॉ. प्रमोद सावंत हांणी मुख्यमंत्रीपदाचो सोपूत घेतलो. तांच्या मुख्यमंत्रीपदाक 4 वर्सा आनी 317 दिस पुराय जाल्यात.

गोंय घटक राज्य जाले उपरांत प्रतापसिंह राणे हांचे सयत चर्चील आलेमांव, डॉ. लुइस प्रोत बार्बोजा, रवी नायक, डॉ. विल्फ्रेड डिसोझा, लुईझीन फालेरो, फ्रान्सीस सार्दीन, मनोहर पर्रीकार, दिगंबर कामत, प्रा. लक्ष्मीकांत पार्सेकार हे फुडारी मुख्यमंत्री जाले.