भांगरभूंय | प्रतिनिधी
भांगरभूंय । प्रतिनिधी
पेडणेः पेडणे पालिका वाठारांत कदंब बसस्टॅण्डा सामकारच्या मुखेल रस्त्या वयलो पोर्तुगीज तेपार बांदलो ल्हान पूल कमकुवत जाल्ल्यान तो मोडून पडपाची भिरांत आसा. पुला पोदचें क्राँक्रिट गळून पडून ताका वेरो गेल्यात. कुशीची राखणे वणतीक धोको तयार जाला. बांदकाम खात्यान उपाय येवजण करून व्हो पूल घट करची अशी मागणी थळाव्या लोकांनी केल्या.
पोर्तुगीज काळांत फिचाणी पद्दतीन ह्या पुलाचें बांदकाम केल्ले. सध्या तें कमकुवत जालां. पूला सरभोंवतणी वाली वाडल्यात. तो मोडून पडल्यार येरादारीची व्हडली समस्या उप्रासपाक शकता. पेडण्याचो आमदार प्रवीण आर्लेकार हांणी पुला कडेन लक्ष दिवन जाय ती उपाय येवजण बांदकाम खात्याक करपाक सांगचें अशें धास्तावल्या लोकांनी सांगलां.
ह्या पुलाचे सुवातेर नवो पूल बांदपाची मागणी समाजीक वावुरपी राजन कोरगांवकार हांणी केल्या. व्हो पूल 1905 वर्सा देशप्रभू घराण्यात बांदल्लो. जितेंद्र देशप्रभू आमदार आसतना तांणी नवो पूल बांदपाचो प्रस्ताव सरकाराक सादर केल्लो. मात अजून सरकारान ताचेर विचार करूं ना. पेडण्याचो आदलो आमदार बाबू आजगांवकार हांणी मालपे ते व्हायकावंट हायस्कूल मेरेन रस्त्याचें सुशोभिकरण करपाची येवजण तयार केल्ली. ताचे मजगतीं दोन पोर्तुगीज तेपा वयले पूल आसात ताची दुरुस्ती करपाची वा थंय नवे पूल बांदपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
