पेडणें म्हाला खातीर मॉडल हॉस्पिटल तयार करतले 

मंत्री विश्वजित राणे म्हायती दितना. वांगडा आमदार प्रवीण आर्लेकार, आदले आमदार दयानंद सोपटे, तुळशीदास गांवस आनी हेर. (निवृत्ती शिरोडकार)

भांगरभूंय | प्रतिनिधी

मंत्री विश्वजीत राणे पेडणें म्हालाचे भोंवडेर 

पेडणें: सत्तरीचे जमनीर पेडणें म्हाला खातीर मॉडर्न सॅटलायट हॉस्पिटल बेगीनूच तयार करतले, अशी गवाय भलायकी मंत्री विश्वजीत राणे हांणी दिली. सोमारा पेडणें म्हालाची भोंवडी करतना मंत्री राणी उलयताले. 

ह्या वेळार आमदार प्रवीण आर्लेकार, आदले आमदार दयानंद सोपटे, भाजपा मंडळ अध्यक्ष तुळसीदास गांवस, जिल्हो वांगडी सीमा खडपे, विवीध पंचायतींचे सरपंच, उपसरपंच, पंच वांगडी, पेडणें उपजिल्होधिकारी दीपक वायंगणकार, मामलेदार अनंत मळीक, चांदेल – हंसापूर सरपंच तुळशीदास गांवस, खाजने, अमेरे, पोरस्कडे पंचायत सरपंच निशा हळदणकार, तांबोसे, मोपा, उगवें पंचायतीचे सरपंच सुबोध महाले, तोरशें सरपंच प्रार्थना मोटे, पेडणें पालिका नगराध्यक्ष माधव सिनाय देसाय, कोरगांव सरपंच समील भाटलेंकार, वारखंड -नागझर सरपंच गौरी जोसलकार, कासरवर्णें सरपंच सुवर्णा केणी, इब्रामपूर, हणखणें सरापंच अशोक धावस्कार, वझरी सरपंच अनिल शेट्ये, आदली सरपंच संगीता गांवकार, विर्नोडा सरपंच सुजाता ठाकूर,  उपनगराध्यक्ष तृप्ती सांवळ देसाय, नगरसेविका उषा नागवेंकर, नगरसेविका आश्विनी पालयेंकार, नगरसेविका विशाखा गडेकार, नगरसेविका राखी कशालकार, नगरसेवक सिद्धेश पेडणेंकार, नगरेसेवक शिवराम तुकोजी, नगरसेवक मनोज हरमलकार, मोरजी सरपंच सुरेखा शेटगांवकार, उपसरपंच पवन मोरजे, पंच विलास मोरजे, पंच मुकेश गडेकार, उपसरपंच कल्पिता कलशांवकार, दिवाकर जाधव, अब्दूल नायक, पंच देविदास नागवेंकार आनी विवीध खात्यांचे अधिकारी हजर आशिल्ले. 

मंत्री विश्वजीत राणे हांणी पेडणें मतदार संघाची भोंवडी करतना सुरवातेक कासारवर्णेच्या भौशीक भलायकी केंद्राक भेट दिवन थंयची परिस्थिती जाणून घेतली. ही इमारत पोरणी जाल्ल्याचें कळटांच हे सुवातेर नवी इमारत बांदपा संबंदी मुख्यमंत्री डॉ. प्रमोद सावंत हांचे कडेन चर्चा करून बेगीनूच हांगा सगळे तरेच्यो सुविधायो उपलब्ध करून दिवपी इमारत बांदतले अशी गवाय तांणी दिली. तशेंच तुयेंचें नवें हॉस्पिटल उबारलां पूण तातूंत डॉक्टर आनी हेर गरजेच्यो सुविधायो उपलब्ध करूंक नाशिल्ल्यान मंत्री राणे उबगले.

जश्यो सत्तरी म्हालांतल्या नागरिकांक, तरणाट्यांक सरकारी नोकर्‍यो उपलब्ध जाल्यात तश्योच नोकर्‍यो पेडणें म्हालांतल्या बेरोजगार युवकांक दिवपा खातीर आपूण यत्न करतलों. भलायकेची समस्या म्हालांत निर्माण जाल्ले विशीं थळाव्या पत्रकारांनी मंत्र्याक प्रस्न केलो तेन्ना तांणी येवपी काळांत हो प्रस्न सोडोवन म्हाला खातीर मॉडेल हॉस्पिटल उबारपाची गवाय तांणी दिली. सत्तरीच्या जाग्यारूच पेडणें म्हालांतल्या तरणाट्यांक नोकर्‍यो मेळटल्यो. मोपा येवपी आयुष्य हॉस्पिटलांतूंय थळाव्यांक रोजगार संदी दिवपाचों यत्न करतलों, अशें मंत्री राणे हांणी सांगलें. 

हॉस्पिटलांत कर्मचारी बेगीन घरा वतात, असो दावो पत्रकारांनी केलो तेन्ना, कामचुकार कर्मचार्‍यांचेर कारवाय करपाची शिटकावणी तांणी दिली. रान खात्या वरवीं ज्यो आडखळी थळाव्यांक घर बांदपा खातीर वा रस्ता करपा खातीर आसतात त्यो सोडोवपाची गवाय तांणी दिली. 

ह्या वेळार मंत्री विश्वजीत राणे  हांणी पेडणें मतदार संघा घातीर 108 रुग्णवाहिकेचें उक्तावण केलें. मांद्रें मतदारसंघाकूय रुग्णवाहिका सेवा उपलब्ध करून दितलों अशें मंत्री राणे हांणी सांगलें. 

ह्या वेळार मंत्री विश्वजित राणे हांणी श्री भगवती देवीचें दर्शन घेतलें.