भांगरभूंय | प्रतिनिधी
‘पीएश्री’ खाला उबारतले 13 मॉडेल स्कूल: मुख्यमंत्री
पणजी: येता त्या 2023-24 ह्या शिक्षणीक वर्सांत पूर्व प्राथमीक शाळा सुरू करपा खातीर शिक्षण खात्यान वट्ट 52 अर्ज स्विकारल्यात. जाल्यार पीएश्री येवजणे खाला विवीध म्हालांत सरकार 13 मॉडेल पूर्व प्राथमीक सरकारी शाळा सुरू करतलें अशी म्हायती मुख्यमंत्री आनी शिक्षण मंत्री डॉ. प्रमोद सावंत हांणी आमदार व्हेंझी व्हिएगश हांणी विचारिल्ल्या लेखी प्रस्नाचे जापेंत दिली.
पयली ते चौथी मेरेन पूर्व प्राथमीक शाळा सुरू करपा खातीर शिक्षण खात्यान 52 अर्ज स्विकारल्यात. तातूंत कोंकणी माध्यमा खातीर 21, इंग्लीशी खातीर 14, मराठी खातीर 10, उर्दू खातीर 5 आनी उर्दू-इंग्लीश आनी हिंदी माध्यमा खातीर दरेकी एका अर्जाचो आस्पाव आसा. जाल्यार गोंय शालेय शिक्षण कायदो 1984 च्या नेम 31 प्रमाण प्रक्रिया पुराय करूंक नाशिल्ल्यान मराठी आनी कोंकणी खातीर दरेकी एक अशे दोन अर्ज शिक्षण खात्यान भायरायल्यात अशें मुख्यमंत्री डॉ. प्रमोद सावंत हांणी जापेंत म्हणलें.
मजगतीं, केंद्र सरकाराच्या पीएश्री येवजणे खाला गोंयांत मॉडेल शाळा उबारपाचेर भर दिवपाची हमी मुख्यमंत्री डॉ. प्रमोद सावंत हांणी फाटल्या अर्थसंकल्पांत दिल्ली. ते प्रमाण गोंय सरकारान विवीध म्हालांत 13 मॉडेल पूर्व प्राथमीक सरकारी शाळा सुरू करतले अशें मुख्यमंत्र्यानी जापेंतल्यान नमूद केलें.
कायमस्वरुपी शिक्षकांची 200 पदां रितीं
विवीध सरकारी मुळाव्या शाळांनी 200 कायमस्वरुपी शिक्षकांची पदां रितीं आसात. हीं पदां भरपाची प्रक्रिया सरकारान सुरू केल्या. तातूंतले 142 कायमस्वरुपी शिक्षक आनी 36 प्रशिक्षीत इंग्लीश शिक्षकांचीं पदां भरपा खातीरची प्रक्रिया सरकारान गतीन केल्या अशी म्हायती मुख्यमंत्री डॉ. प्रमोद सावंत हांणी आमदार क्रुझ सिल्वा हांच्या लेखी प्रस्नाचे जापेंतल्यान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
