पुराभिलेख खात्याच्या कर्मचाऱ्यांचे जामीन अर्ज न्यायालयान भायरायले

भांगरभूंय | प्रतिनिधी

कळंगूटे मालमत्ता हडप प्रकरण

पणजी: बनावट दस्तावेज तयार करून कळंगूटे बेकायदो पद्दतीन मालमत्ता हडप केल्ल्या प्रकरणांत विशेश तपास पंगडान (एसआयटी) फोंडेंच्य धिरेश नायक, महेश नायक ह्या पुराभिलेख खात्याच्या कर्मचाऱ्यांक अटक केली. अटक केल्ल्या दोगूय दुबावितांनी म्हापशेंच्या पयलो वर्ग न्यायालयांत दाखल केल्ले जामीन अर्ज न्यायालयान भायरायले. हे विशींचो आदेश न्या. पुजा देसाय हांणी काल (मंगळारा) जारी केलो.

ह्या प्रकरणांत हिलोरियो फर्नांडीस आनी जॅनेट फर्नांडीस हांणी कागाळ दाखल केल्या. ते प्रमाण कागाळदारांची कळंगूटे सर्वे क्रमांक 26/9 आनी सर्वे क्रमांक 476/2 जमनीचें बनावट मालकीपत्र आनी हेर दस्तावेज तयार करून हडप केल्ल्याचे कागाळींत नमूद केल्लें. उपरांत वयली कागाळ एसआयटी कडेन वर्ग केल्ली.

ह्या प्रकरणांत एसआयटीन जमीन हडप प्रकरणांतलो मुखेल सुत्रधार सेड्रीक फर्नांडीस, अँटोनेट उर्फ अँटोनिटा फर्नांडीस, मारिया अँजेला उर्फ अँजेलिया फर्नांडीस, रायाजी पाटील, सुनील गोएल, बार्देसचे मामलेदार हांचे आड बनावट दस्तावेज तयार करप, मूळ कागदपत्रांत बेकायदो रितीन फेरफार करप आनी फटवणुकीच्या आरोपा खाला गुन्यांव दाखल केल्लो. ह्या प्रकरणांत एसआयटीन धिरेश नायक, महेश नायक आनी पुराभिलेख खात्याच्या कर्मचाऱ्यां सयत वेवसायीक अनील नायक हाका बुधवारा 4 जानेवारी 2023 दिसा अटक केल्ली.

त्या तिगांनीय उपरांत म्हापशेंच्या पयलो वर्ग न्यायालयांत जामीन अर्ज दाखल केले. तातूंतलो धिरेश नायक, महेश नायक ह्या दोगांक न्यायालयान पयली चार दीस पुलीस कोठी दिली. उपरांत ती सोंपले उपरांत त्या दोगांकूय न्यायालयान सोमारा न्यायालयीन कोठयेंत धाडले. उपरांत मंगळारा न्यायालयान वयल्या दोगांचोय जामीन अर्ज भायरायलो.

जाल्यार तिसरो दुबावीत अनील नायक दुयेंत पडिल्ल्यान ताका हॉस्पिटलांत दाखल केल्लो. ताका हॉस्पिटलांतल्यान डिसचार्ज मेळ्ळे उपरांत न्यायालयान ताका आनीक चार दीस पुलीस कोठी दिली. जाल्यार न्यायालयायान ताच्या जामीन अर्जा वयली फुडली सुनावणी 13 जानेवारी दिसा दवरल्या.

पुर्वजांची बादें-आसगांवां सर्वे क्र. 47/1 तली सुमार 5,900 चौमि जमीन हडप केल्ल्याची कागाळ माटिल्डा कुतिन्हो (अहमदाबाद) आनी एलिटिओ कार्व्हालो (बादें-आसगांव) हांणी विशेश चवकशी पंगडा कडेन (एसआयटी) केल्या. ह्या प्रकरणांत एसआयटीन दुबावीत मोहम्मद सुहैल उर्फ मायकल ह्या मुखेल सुत्रधाराक अटक केल्या. अटक केल्लो दुबावीत सुहैलान म्हापशेंच्या पयलो वर्ग न्यायालयांत जामीन अर्ज दाखल केला. ह्या प्रकरणाची फुडली सुनावणी 12 जानेवारी दिसा जातली.