पी व्ही सिंधू पयलेच फेरयेंत हारली

भांगरभूंय | प्रतिनिधी

दोन खेपेची ऑलिम्पीक पदक जैतिवंत पी व्ही सिंधू हिचें इंडिया ओपन सुपर 750 बॅडमिंटन सर्तींतलें आव्हान पयलेच फेरयेंत सोंपलें. आदली वस्ताद आनी संवसारीक क्रमवारींत सातवे सुवातेर आशिल्ली सिंधूक संवससारीक क्रमवारींत 30वे सुवातेर आशिल्ली थायलॅण्डाची सुपानिदा केटथोंग हिणें 12-21 आनी 20-22 अशा सरळ गेमींनी हारयली.

25 वर्सां पिरायेची सुपानिदान फाटले खेपे लेगीत हे सर्तीचे सेमी फायनलींत सिंधूक हारयिल्ली.

मजगतीं, भारताची आनीक एक खेळगडी सायना नेहवालान आपले पयले मॅचींत डॅनमार्काचे मिया ब्लिचफेल्ट हिका 21-17, 12-21 आनी 21-19 अशा तीन गेमींनी हारयली. सायना आतां फुडले फेरयेंत टोकियो ऑलिम्पिकांत भांगरा पदक जिखपी चेन युफेई आड खेळटली.

थायलॅण्डाची खेळगडी सुपानिदा आड सिंधूक बरेंच झुजचें पडलें. सुपानिदाचे रिटर्न फरफेक्ट आशिल्ले. तशेंच पयले गेमींत तिणें रॅलीचेर लेगीत आपलें नियंत्रण दवरिल्लें.

सिंधून दुसरे गेमींत आव्हान दिलें. तिणें 12-17 अशा फरकान फाटीं पडल्या उपरांत 20-19 अशी आघाडी लेगीत घेतली. पूण, उपरांत तिणें मॅच वगडायली.

दादल्यांच्या एकोड्या गटांत संवसारीक क्रमवारींत 12वे सुवातेर आशिल्ल्या लक्ष्य सेनान जबरदस्त खेळ करतना संवसारीक क्रमवारींत णववे सुवातेर आशिल्ल्या प्रणयाक हारोवन मलेशिया ओपनांत मेळिल्ले हारीचो बदलो घेतलो. सेनान इंदिरा गांधी स्टेडियमांतल्या केडी जाधव हॉलांत जाल्ले मॅचींत प्रणयाक 21-14 आनी 21-15 असा हारयलो.

दादल्यांच्या दोट्टी गटांत सात्विकसाईराज रंकीरेड्डी आनी चिराग शेट्टी हे भारताचे जोडयेन फुडले फेरयेंत सुवात मेळयली. भारताचे जोडयेन स्कॉटलॅण्डाचे क्रिस्तोफर ग्रिमली आनी मॅथ्यू ग्रिमली हे जोडयेक 21-13 आनी 21-15 अशा फरकान हारयली.