भांगरभूंय | प्रतिनिधी
वेपारी संघटणाः नगरविकास मंत्री, थळाव्या आमदाराची भेट घेवपाचो थाराव
भांगरभूंय । प्रतिनिधी
म्हापशें: म्हापशेंच्या दुकानदारांक धाडिल्ल्या कारणां दाखय नोटिशे संबंदांत कायद्यांत गरजेची दुरुस्ती करची, अशी मागणी थळावे आमदार आनी नगरविकास मंत्र्यांची भेट घेवन करची, असो थाराव म्हापशें वेपारी संघटणेचे बसकेंत घेतलो.
मरड म्हापश्यां म्हपशें वेपारी संघटणेचे अध्यक्ष श्रीपाद सावंत हांचे अध्यक्षते खाला साबार बसका जाली. ह्या वेळार व्हड संख्येन संघटणेचे वांगडी हाजीर आशिल्ले. संघटऩेचे सचीव सिद्धेश रावत, आदले अध्यक्ष नारायण कारेकार, नरेश तिवरेकार, यशवंत गवंडळकार आनी आशिष शिरोडकार हांणी हाजीर आशिल्ल्यांक मार्गदर्शन केलें. हे बसकेंत पाडुरंग सावंत, जितेंद्र फळारी हांणीय आपलें मत मांडलें. अॅड. शैलेश वेंगुर्लेकार हांणी कायद्याची बाजू समजावन सांगली.
पालिका मुख्याधिकाऱ्यान वेपारी वर्गाक धाडिल्ल्या कारणां दाखय नोटिशेचेर हे बसकेंत खोलायेन चर्चा जाली. ह्या वेळार वेपाऱ्यां आड कारस्थान रचपी कांय घटकांचो खर उतरांनी निशेध केलो.
पालिकेन ज्या कायद्या खाला पालिका बाजारपेठेंतल्या दुकानकारांक ह्यो नोटिसो धाडल्यात, त्या कायद्यांत गरजेची सुदारणा करून घेवचे खातीर थळावे आमदार आनी नगरविकास मंत्र्यांची भेट घेवप, तशेंच कारणां दाखय नोटिशेक जाप दिवपाक उण्यांत उणें 90 दिसांचो वेळ दिवचो, अशी मागणी करपी थाराव घेतले. ही बसका एका आरटीआय कार्यकर्त्यान मार्केटा संबंदांत म्हापशें पालिके आड न्यायालयांत दाखल केल्ले याचिकेच्या जनजागृती संबंदांत आशिल्ली. मुख्याधिकाऱ्यान धाडिल्ले कारणां दाखय नोटिशेक लागून हजारांनी गोंयकार प्रत्यक्ष वा अप्रत्यक्षपणान हाका लागून प्रभावीत जातले. हें लक्षांत घेवन मुख्यमंत्र्याच्या स्वयंपूर्ण गोंय ह्या उपक्रमाचो विचार करून ह्या पालिका कायद्यांत गरजेची सुदारणा करचे खातीर संघटणेन आमदार आनी नगरविकास मंत्र्याची भेट घेवपाचो थाराव एकमतान घेतला, अशी म्हायती म्हापशें वेपारी संघटणेचे सचीव सिद्धेश रावत हांणी दिली.
कित्या खातीर कारणां दाखय नोटीस?
भाडेकरू कबलात पत्र नुतनीकरणा विशीं, म्हापशें पालिकेन कांय दुकानकारांनी दुकान भायले भायर तिसऱ्या मनशाक भाड्याक दिल्ले खातीर संबंदीत दुकान आनी स्टॉल्साच्या मूळ 309 भाडेकरूंक पालिकेन कारणां दाखय नोटीस जारी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
