पार्सेकार, उत्पल हांचो भाजप प्रवेशकेंद्रीय नेतृत्वाच्या निर्णयाचेर निंबून

भांगरभूंय | प्रतिनिधी

भाजप प्रदेशाध्यक्ष सदानंद शेट तानावडेन केलें स्पश्ट

भांगरभूंय I प्रतिनिधी
पणजी : गोंयांत भाजपाची बुन्याद घालपांत म्हत्वाचें योगदान दिवपी आदले मुख्यमंत्री प्रा. लक्ष्मीकांत पार्सेकार हांणी पक्षाचो राजिनामो दिल्लो, तेन्ना खूप दुख्ख जाल्ले. पार्सेकार तशेंच अादले
मुख्यमंत्री स. मनोहर पर्रीकार हांचो पूत उत्पल पर्रीकार हांकां परतून पक्षांत घेवपाचो निर्णय भाजपाचे केंद्रीय फुडारी घेतले, अशें प्रदेशाध्यक्ष सदानंद शेट तानावडे हांणी सोमारा स्पश्ट केले.

प्रुडंट खबरां चॅनेलाक दिल्ले मुलाखतींत ते उलयताले. 2022तली विधानसभा वेंचणूक जिखपा खातीर भाजपाच्या सगल्याच कार्यकर्त्यांनी खर यत्न चलयिल्ले आसतनाच, उमेदवारी मेळूंक नाशिल्ल्यान पार्सेकार, उत्पल हांणी पक्षा पसून पयस वचप पसंत केले. प्रदेशाध्यक्ष ह्या नात्यान आपूण तांकां समजावपाचे जायते यत्न केले. पूण तांणी पक्ष सोडलो. गोंयांतल्या भाजपाचे वाटचालींत पार्सेकार हांचे व्हड योगदान आसा.
प्रदेशाध्यक्ष म्हूण तांणी पक्षाक घटाय दिल्ली. तांणीय असो निर्णय घेतिल्ल्यान आपणाक खूब दुख्ख जाल्ले. आतां तांकां परतून पक्षांत घेवपाचे वा ना, हे भाजपाच्या केंद्रीय नेतृत्वाचेर निंबून आसा, अशें तानावडे हांणी म्हणलें.
केंद्र आनी राज्यांतल्या भाजप सरकारची कामगिरी दर्जेदार आसा. ताका लागून फाटल्या कांय वर्सांत हेर पक्षांतल्या जायत्या फुडाऱ्यांनी भाजपांत प्रवेश केला. तातूंतल्या कांय जाणांनी पयलीं भाजपाचेर टिकाय केल्ली. तेन्ना ते तांच्या भुमिकेचेर ठाम आशिल्ले. पूण ते उपरांत तांकां भाजपाचे विचार पटिल्ल्यानूच ते पक्षांत आयले. तातूंत तांची चूक ना, अशें तांणी स्पश्ट केले.
मजगतीं, लोकसभा आनी 2027 च्या विधानसभा वेंचणुकांचीय तयारी भाजपान सुरू केल्या, अशेंय तानावडे हांणी म्हणलें.
कोणाकूय पक्षांत येवपाचे आसा, जाल्यार येवपाक हरकत ना. पक्षाचो विस्तार जावपा खातीर तशेंच कार्य वाडोवपा खातीर नव्या लोकांक पक्षांत घेवचे पडटात. प्रा. लक्ष्मीकांत पार्सेकार तशेंच उत्पल पर्रीकार हे प्रतिश्ठीत फुडारी आसात. दोगांकूय पक्षांत परत घेवचे काय ना, हाचो निर्णय केंद्रीय नेतृत्व घेतले. थळावे नेतृत्व हाचेर निर्णय घेवंक शकना, अशें सदानंद शेट तानावडे हांणी सांगलें.

ती चूक काँग्रेसची, मायकलाची न्हय
अामदार मायकल लोबो हांणी विधानसभा वेंचणुके पयलीं काँग्रेसींत प्रवेश केलो. काँग्रेसचें सरकार येतलें म्हूण मायकल काँग्रेसींत गेले. ते उपरांत काँग्रेसच्या उमेदवारीचेर वेंचून आयले उपरांत तांकां विरोधी पक्षफुडारीपद दिले. पूण आपली पुराय जीण भाजपांत घालयिल्ली व्यक्ती काँग्रेसींत कशी रावतली, हाचो विचार त्या वेळार काँग्रेसच्या फुडाऱ्यांनी करपाक जाय अाशिल्लो. ताका लागून त्या वेळार लोबो न्हय, जाल्यार काँग्रेसची चूक अाशिल्ली, अशेंय सदानंद तानावडे हांणी म्हणलें.