भांगरभूंय | प्रतिनिधी
ड्रायव्हरा सयत तीन कामगार वाटावले
फोंडें: पाज-शिरोड्यां रस्तो अशीर आशिल्ल्यान चिऱ्याचो ट्रक काल (शुक्रारा) सकाळीं 11.15 वरांच्या सुमाराक लवंडलो. ह्या अपघातांत लायटीचो खांबो मोडून पडलो. सुदैवान ट्रकाच्या कॅबिनांत आशिल्ले चौग जाण वाटावले. ह्या मार्गा वयली रस्त्याची रुंदी वाडोवपाची मागणी थळावे लोक करतात.
शुक्रारा सकाळीं दाबाळ सावन शिरोड्यां चिरे घेवन वचपी जीए 09 यू 5245 क्रमांकाचो ट्रक रस्त्याचे कुशीक लवंडलो. हातूंत ड्रायव्हरा सयत हेर तीन गोंया भायले कामगार सुदैवान वाटावले. रस्त्याचे कुशीक आशिल्लो लायटीचो खांबो मोडिल्ल्यान रोखडेंच वीज खात्याच्या कर्मचाऱ्यांक आपयले.
गवळवाडो-निरंकाल ते शिरोडें मेरेनच्या रस्त्याची रुंदी वाडोवपाची मागणी फाटल्या कितल्याशाच वर्सां सावन थळावे लोक करीत आसात. अशीर रस्त्याक लागून ह्या मार्गार अशे अपघात जायत आसतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
