भांगरभूंय | प्रतिनिधी
-पर्यटन खात्या कडल्यान निविदा जारी
पणजीः दर्यादेग नितळसाण करपा खातीर राज्य सरकार फुडल्या पांच वर्सां खातीर 90 कोटी 27 लाख 32 हजार 129 रुपया खर्च करपाचें आसा. पर्यटन खात्यान हालींच हे संबंदी नवी निविदा जारी केल्या. ते प्रमाण निविदा जिखपी कंत्राटदाराक राज्यांतल्या वट्ट 50, उत्तरेंत 23 आनी दक्षिणेंत 27 दर्यादेगांचेर पांच वर्सां नितळसाण सांबाळची पडटली. कोयर वेवस्थापनाचें काम सकाळीं 8.30 ते 12.30 मेरेन आनी दनपारां 2 ते 6 मेरेन करचें पडटा.
हातूंत दर्यादेगांची नितळसाण, कोयर क्रमवारी, हालचाल आनी एकंदर कोयर वेवस्थापन हांचो आस्पाव जाता. हातूंत ओलो आनी सुको कोयर हांचो आस्पाव जाता. कंत्राटदाराक उत्तर गोंयचे देगेवयलो कोयर एकठांय करून साळगांवच्या कोयर प्रकल्पांत हाडचो पडटलो, जाल्यार दक्षिण गोंयचो कोयर काकोडेंच्या कोयर प्रकल्पांत घालचो पडटलो. पांच वर्सां पुराय जाले उपरांत कामाच्या दर्ज्याचेर आदारून आनीक दोन वर्सां खातीर कंत्राट वाडोवपाक परवानगी दिल्या.
कामां कंत्राटा खातीर निविदा सादर करपाची निमाणी तारीख 15 फेब्रुवारी दनपारां 3.30 वरांचेर आसा. 16 तारखेक तंत्रीक बोली उक्ती जातली. ताचे आदीं 2 फेब्रुवारीक पर्यटन खात्याची बसका जातली. कामार घेवपाचे 60% कर्मचारी गोंयकार आसूंक जाय. राज्यांतल्या 50 दर्यादेगांची नितळसाण करपा वांगडाच कंत्राटदाराक 122 अॅप्रोच रस्ते, प्रवेश रस्ते आनी झोपडपट्ट्योय निवळ करच्यो पडटल्यो. इत्सूक कंत्राटदाराक 28 लाख रुपया आगाऊ रक्कम भरची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
