पत्रकार अनंत साळकार अंतरले

भांगरभूंय | प्रतिनिधी

देहदान करपाचो घरच्यांचो निर्णय

पणजी : सुनापरान्ताचे आदले संपादक, अणभवी पत्रकार अनंत (संदेश) साळकार (55, पिळगांव) हांकां आयतारा सांजवेळा साडेस वरांचेर उपचारा मजगतीं मरण आयलें. 1 आॅक्टोबराक चोडणेंच्यान घरा वतना वाटेर रानदुकर आडवो आयिल्ल्यान स्कुटरी वयल्यान पडून तांचे तकलेक मार लागिल्लो. गोंय पत्रकार संघटणेन, कोंकणी भाशा मंडळान तांच्या मरणाचेर दुख्ख उक्तायलां. साळकार हांचे इत्से प्रमाण, तांच्या घरच्यांनी तांची कूड जीएमसीक दिवपाचो निर्णय घेतला. सकाळीं 10 वरांचेर हे सोपस्कार जातले. उपरांत सांजवेळा 4 वरांचेर पिळगांवां शोकसभा जातली. तांचे फाटल्यान घरकान्न अरुंधती आनी चली मेखला असो परिवार आसा.

फाटलीं 25 वर्सां अनंत साळकार पत्रकारितेत आशिल्ले. तरुण भारताचे ते बरोच काळ आवृत्ती मुखेली आशिल्ले. उपरांत सुनापरान्ताचे संपादक. लोकमता उपरांत सध्या ते गोमन्तकांत सहाय्यक संपादक म्हूण काम करताले. कवी, एकांकिका, गझलकार, उपरोधीत लिखाण करपांत ते फिशाल आशिल्ले. विशेश म्हणल्यार कोंकणी, मराठी आनी इंग्लीश ह्या तिनूय भाशांचेर तांचो शेक आशिल्लो. खास करून इंग्लिशींतल्यान कोंकणी, मराठी अणकार करपांत तांचो हात धरपी कोण नाशिल्लो.

कोंकणी भाशा मंडळाचीं आर्गां

अनंत साळकार हांचे पत्रकारितेच्या मळार भोव मोलाचें योगदान आशिल्लें. सुनापरान्त दिसाळ्याचे संपादक म्हणून तांणी काम केलां. साहित्याच्या मळारूय तांचें भोव मोलाचें योगदान आशिल्लें. ते एक उत्कृश्ठ कवी तशेंच ललीत निबंद लेखक. कसल्याच प्रकाश झोतांत येनासतना ते आपलें लिखाण करीत रावले. वेगळ्यावेगळ्या खबरापत्रांनी विंगड विंगड विशयांचेर तांचे लेख छापून आयल्यात. तांणी एकांकीका, गझल अशा प्रकारांतय लेखन केलां.

अनंत साळकार हांच्या मरणान एक बरो पत्रकार आनी लेखक ह्या संवसाराक अंतरला. कोंकणी भाशा मंडळ, गोंयान तांकां आर्गां ओंपल्यांत. तांचें मरण हें एकंदर साहित्यीक मळार पोकळी निर्माण करून गेलां अशें मंडळाचे वतीन उजवाडायिल्ल्या प्रसिद्धी पत्रकांत अध्यक्ष अन्वेषा सिंगबाळ हांणी म्हणलां.

मजगतीं, नवप्रभाचे संपादक परेश प्रभू हांणी अनंत साळकार हांच्या मरणाचेर दुख्ख उक्तायलां. ते एक मृदुभाशी बुद्धिमान पत्रकार आशिल्ले. शैलीदार अस्खलीत मराठी लेखनाची तांक तांचे कडेन आशिल्ली, अशीं आर्गां तांणी ओंपल्यांत.