भांगरभूंय | प्रतिनिधी
पणजीः पणजी शारांत खूब कडेन सीसीटीव्ही कॅमेरे बसयल्यात, पूण अजून ह्या कॅमेऱ्या वयल्यान वाहन चालकांक तालांव दिवपाची प्रक्रिया सुरू जावंक ना. खूबश्या मुखेल सुवातांचेर, सिग्नलांचे सुवातेचेर हे सीसीटीव्ही कॅमेरे बसयल्यात. पणजी शारांत वट्ट 257 सीसीटीव्ही कॅमेरे बसयल्यात.
पणजी स्मार्ट सीटी खाला वट्ट 11.44 कोटी रुपया खर्च करून पणजी पाटो, मिरामार, चर्च चौक, भाटलें, दोनापावल आनी हेर मुखेल सुवातांचेर आधुनीक तंत्रज्ञानाचो वापर करून हे कॅमेरे बसयल्यात. पूण अजून ह्या कॅमेऱ्यां वयल्यान बेशिस्त वाहन चालकांचेर कारवाय सुरू जावंक ना. खूब खेपे सांगून लेगीत वाहन चालक येरादारी नेम पाळिनात. पे पार्किंगाक पाळो दिनात. मेळत थंय गाडयो दवरतात. ते खातीर पणजी म्हापालिकेन फुडाकार घेतला.
तालांव दिवपाचो अधिकार येरादारी खात्याकः महापौर
पणजी शारांत येरादारेंत शिस्त येवची हे खातीर हे कॅमेरे बसयल्यात. ते चालू आसात, पूण तालांव दिवपाचो अधिकार हो येरादारी खातें आनी येरादारी पुलिसांक आसा. पणजी शारांतली वाडटी येरादारी समस्या सोडोवचे खातीर आमी स्मार्ट सीटी खाला हे कॅमेरे बसयल्यात. ह्या कॅमेऱ्यां विशीं पुराय म्हायती आपूण रोखडोच बसका घेवन दितलों, अशें पणजी म्हापालिकेचे महापौर रोहीत मोंसेरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
