भांगरभूंय | प्रतिनिधी
पणजी : पणजी ते वास्को उदका मार्गाक लागून दोन शारां मदले अंतर उणें जातलें. तशेंच राज्याच्या पर्यटनाक लाव जातलो, अशें ट्वीट प्रधानमंत्री नरेंद्र मोदी हांणी केलां.
दोना पावला हालींच जेटीचें उक्तावण जालां. हे जेटी वेल्यान वास्को मेरेन फेरीसेवा सुरू करपाचे यत्न आसात. ही फेरी सेवा सुरू जावंंक ना. तरी ती सुरू करपाचो प्रस्ताव आसा. पणजी ते वास्को फेरीसेवेक लागून प्रवाशांक लाव जातलो. तशेंच पर्यटनाक उर्बा मेळटली.
पणजी ते वास्को शारांक जोडपी उदकामार्ग 68 तयार जाला. दोनूय शारां मदले अंतर 9 किलोमिटरान उणें जालां. पणजी ते वास्को हे रस्त्या वेलें अंतर 32 किलोमिटर आसा. पणजे सावन वास्को वचपाक 45 मिनटां लागतात. उदका मार्गाक लागून पणजी सावन वास्को 20 मिनटांत पावप शक्य आसा. उदका मार्गाक लागून वेळ तशेंच पयशांची बचत जातली, अशें ट्वीट प्रधानमंत्र्यांनी केलां.
ही फेरीसेवा अजून सुरू जावंक ना, अशें स्पश्टीकरण केंद्रीय पर्यटन राज्य मंत्री श्रीपाद नायक हांणी केलां.
मजगतीं, रस्तो येरादारी वयलो ताण उणो करपा खातीर केंद्र सरकारान उदका मार्गांच्या विकासा खातीर यत्न सुरू केल्यात. ते खातीर ‘सागरमाला’ येवजणेचेरूय काम सुरू आसा. गोंयांतल्या कांय न्हंयांचोय उदका मार्ग म्हूण वापर करपाचे निश्चीत जालां आनी ह्या न्हंयां मदीं ते पद्दतीन सुविधा करपाची प्रक्रिया लेगीत केंद्र सरकारान सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
