भांगरभूंय | प्रतिनिधी
खबरां संस्था
मुंबयः अंबाती नायडून (78) वादळी खेळी करून लेगीच चेन्नय सुपर किंग्जाक आयपीएलांतले 38वे मॅचींच पंजाब किंग्जा कडल्यान 11 धांवड्यांनी हाऱ खावची पडली. ह्या जैतान पंजाबान आयपीएल क्रमवारींतली आपली सुवात घट्ट केली. फाटले मॅचींत धोनीन चेन्नय खातीर फिनिशराचें काम केलें. हे खेपे मात ताका तातूंत अपेश आयलें. नाबाद 88 धांवड्यो करून ओपनर शिखर धवनान पंजाबाच्या जैतांत म्हत्वाचें योगदान दिलें. धवन आनी रायडू हे मॅचींतले हिरो धारले.
चेन्नय सुपर किंग्जान टॉस जिखून पंजाब किंग्जाक पयलीं खेळपाक लायलें. तांणी आपले 20 ओव्हरींत 4 बाद 187 धांवड्यो केल्यो. शिखर धवनान सगल्यांत चड नाबाद 88 धांवड्यो पंजाबा सामकार जैता खातीर 188 धांवड्याचें आव्हान दवोरलें. चेन्नय वतीन ड्रवेन ब्रवोन 2 विकेटी घेतल्यो. शिखर धवनान 37 बॉलांत आपलें आयपीएलांतले कारकिर्दींतलो 46वो अर्द शेंकडो केलो. ह्या सिझनांतलो धवनाचो व्हो दुसरो आनी चेन्नय आडचो वट्ट 8वो अर्द शेंकडो आसा. ताणे 59 बॉलांत 9 चौके आनी 2 सक्यांनी नाबाद 88 धांवड्यो केल्यो.
निमाणे पांच ओव्हरींत पंजाबान 64 धांवड्यो काडल्यो, लियम लिविंगस्टोनान 7 बॉलांत 19 काडल्यो. शिखर धवन आनी भानुका राजपक्षेन दिसरे विकेटी खातीर 71 बॉलांत 110 धांवड्यो केल्यो. ड्वेन ब्रवोन राजपक्षेक आवट करून ही जोडी फोडली. ताणे 32 बॉलांत 42 धांवड्यो केल्यो. तातूंत दोन सके आनी दोन चौके आशिल्ले. राजपक्षे आवट जाल्या उपरांत लिविंगस्टोन धवनाक येवन मेळ्ळो
धवनाच्यो 6 हजार धांवड्यो
पंजाबाची सुरवात स्लो जाली. पयले विकेटी खातीर मयंक अगरवाल आनी शिखर धवनान 35 बॉलांत 37 धांवड्यो केल्यो. 6वे ओव्हरींत महीश थिकक्षाणान मयंकाक (18) आवट केलो. पॉवर प्ले मेरेन पंजाबाचो स्कोर 1 बाद 37 आशिल्लो. धवनान आयपीएलांते आपल्यो 6 हजार धांवड्यो पुराय केल्यो. विराट कोहली (6402) उपरांत आयपीएलांत विक्रम करपी धवन दो दुसरो बॅट्समन आसा. धवन 11 धांवड्यांचेर खेळटालो तेन्ना ताणे टी-20 फॉर्मेटांतल्यो 9 हजार धांवड्यो पुराय केल्यो. हो पांवडो हातासपी विराट कोहली (10392) आनी रोहीत शर्मा (10048) तो तिसरो खेळगडी थारला. शिखर धवनाची आयपीएलांती आयची 200वी मॅच आशिल्ली. धोनी (228) दिनेश कार्तिक (221), रोहीत शर्मा (221), विराट कोहली (215), रवींद्र जडेजा (208), सुरेश रैना (205) आनी रॉबिन अथप्पा (201) हांच्या फाटल्यान 200 मॅच खेळपी तो 8वो खेळगडो जाला.
जैता खातीर 188 घांवड्यो करपाचें आव्हान स्विकारून ऋतुराज गायकवाड आनी रॉबिन अथप्पान चेन्नयच्या डावाक सुरवात केली. 10 धांवड्यो जाल्ल्यो तेन्ना उथप्पाक (1) संदीप शर्मान आवट करून तांकां पयलो धपको दिलो. आर्शदीप सिंग आनी ऋषी धवनान मिचेल सेन्टनर ((ृ9) आनी शिवम दुबेक (8) फाटोफाट बाद करून चेन्नयची स्थिती 3 बाद 40 अशी केली. ऋतुराज गायकवाडान एक बाजू लावन धरिल्ली. दुसरे वटेन अंबाती रायडून ताका जाय असो वांगड दिवन पंगडाचो स्कोर 11वे ओव्हरींत 81 मेरेन व्हेलो. मात 14वे ओव्हरींत राबाडान गायकवाडाक (300 मयंक अगरवालाच्या हातांत कॅच दिवपाक लावून चेन्नयक चवथो धपको दिलो. ह्या वेळरा मॅच तांच्या हातांतल्यान वता अशें दिसपाक लागल्लें. अबाती रायडून मजगतीं आपलो अर्द शेकडो पुराय केलो. निमाण्या 3 ओव्हरींत चैन्नयक जौता खातीर 41 धांवड्यो जाय आशिल्ल्यो. 7 चौके आनी 6 सक्यांनी 75 धांवड्यांचेर रायडू खेळटालो. रवींद्र जडेजाच्या सांगातान रायडू पंगडाक जैत मेळोवन दितलो अशी शक्यताय ह्या तयार जाल्ली. 18वे ओव्हरींत हे जोडयेन पंगडाचो स्कोर 150 धांवड्यांचेर व्हेलो. मात रोखडोच राबाडान चेन्नयक सगल्यांत व्हडलो धपको दिलो. ताणे रायडूक 78 धांवड्याचेर बाद केलें आनी चेन्नयक जैत मेळोवन दिवपाचें काम परत एक फावट धोनीचेर पडलें. रायडून 39 बॉलांत 78 धांवड्यो केल्यो. निमाण्या दोन बॉलांत 19 धांवड्यो करप शक्य नाशिल्ल्यान चेन्नय निमणे हार मानून घेवची पडली. 20 ओव्हरींत तांणी 6 बाद 176 धांवड्यो केल्यो. गॅम फिनिशर म्हणून काम करपाच्या बोवाळांत धोनीन (12) आपली विकेट दिली. कॅप्टन रवींद्र जडेजा 21 धांवड्यांचेर नाबार उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
