भांगरभूंय | प्रतिनिधी
सत्तरींत पंचायत वेंचणुकेंत उमेदवारांची गर्दी जावपाची शक्यताय
भांगरभूंय । प्रतिनिधी
वाळपयः सरकारी नोकरी जाय जाल्यार सत्तरी म्हालांतल्या खंयचेय पंचायतींत पंच म्हूण वेंचून येवप गरजेचें, अशे तरेचें सत्तरींत वातावरण तयार जाला. ताका लागून सत्तरी म्हालांतल्यो पंचायत वेंचणुको सुमारा भायर रंगपाची शक्यताय आसा.
बिरेस्तार हो शुभदीस अशें मानून 21 जुलयाक सत्तरी म्हालाच्या मामलेदार कार्यालयांत उमेदवारी दाखल करचे खातीर उमेदवारांची व्हड प्रमाणांत गर्दी जाल्ली. सोमार हो उमेदवारी अर्ज दाखल करपाचो निमाणो दीस. ताका लागून सत्तरी म्हालांतल्या चडश्या सगळ्याच प्रभागांनी उमेदवारांची हिसपा भायर गर्दी जातली, अशें चित्र दिसता.
फाटले पंचायत वेंचणुकांनी वेंचून आयिल्ल्या पंचांक सरकारी नोकऱ्यांची सोर्त लागिल्ली. जाल्यार कांय पंचां वरवीं सरकारी नोकरी मेळिल्ल्यान पंचांचें वजन वाडलां. फुडारांत आपल्या प्रभागांत सरकारी नोकरी मेळपाक जाय वा पंचांक सरकारी नोकरेची संद मेळपाक जाय जाल्यार पंच म्हूण वेंचून येवप खूब गरजेचें आसा, अशें वातावरण सत्तरी म्हालांत पाताळ्ळां. हेच खातीर पंचायत वेंचणुकांनी देंवपाचें खूबशा उमेदवारांनी थारायलां. हेंच चित्र बिरेस्तारा वाळपय मामलेदार कार्यालयांत पळोवपाक मेळ्ळें. सत्तरी म्हालांतल्या वट्ट बारा पंचायतींच्यो वेंचणुको जातल्यो. तातूंतल्यान 97 प्रभागांतल्यान पंच वेंचून येतले. 12 पंचायतींतले उमेदवारी अर्ज स्विकारपाक चार विभाग केल्यात. दरेका विभागांत उमेदवारांनी व्हड प्रमाणांत गर्दी केल्ली.
उमेदवारी अर्ज भरपाक लांब रांको
बिरेस्तारा सकाळीं 9.30 वरांच्या सुमाराक पंचायत वेंचणुकां खातीरचे उमेदवारी अर्ज घेवपाक सुरवात जाली. ते सादर करचे खातीर उमेदवारांच्यो लांब रांको लागिल्ल्यो. हाका लागून वाळपय मामलेदार तशेंच वेंचणूक अधिकारी कौशीक देसाय, संयुक्त मामलेदार साईश नायक, निरिक्षक तशेंच उपजिल्होधिकारी मंगलदार गांवकार हे कार्यालयांत दनपारां 1 वरा मेरेन बसून आसिल्ले. उमेदवारी अर्ज घेतना तांकां तकली वयर काडपाक लेगीत मेळनाशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
