भांगरभूंय | प्रतिनिधी
न्या. उर्मिला जोशी फाळके हांचीय न्यायाधीशपदार नेमणूक
भांगरभूंय । प्रतिनिधी
पणजीः मुंबय उच्च न्यायालयाचे अतिरिक्त न्यायाधीश भारत पी. देशपांडे हांकां सोमारा 6 जूनाक सकाळीं 10 वरांचेर सोपूत दितले. ही कार्यावळ न्यायालयाच्या सेंट्रल हॉलांत जातली. ह्या वेळार तांचे वांगडा न्या. उर्मिला एस. जोशी फाळके हांकांय सोपूत दितले.
29 सप्टेंबर 2021 ह्या दिसा जाल्ले सर्वोच्च न्यायालयाचे कॉलेजियम बसकेंत देशपांडे हांचे सयत ए. एस. पानसरे, एस. सी. मोरे आनी यू. एस. जोशी फाळके हांचीय मुंबय उच्च न्यायालयाच्या न्यायाधीशपदाचेर नेमणूक करपाची शिफारस केल्ली.
मजगतीं, शुक्रारा जारी केल्ले अधिसुचोवणेंत न्यायाधीश बी. पी. देशपांडे हांचे सयत यू. एस. जोशी फाळके हांची मुंबय उच्च न्यायालयाच्या अतिरिक्त न्यायाधीशपदाचेर नेमणूक केल्या. नागपूर महाराष्ट्रांत जल्मल्ले न्या. देशपांडे हांणी जी. एस. वाणिज्य म्हाविद्यालयांतल्यान पदवी घेतल्या. ते उपरांत तांणी युनिव्हर्सीटी कॉलेज ऑफ लॉ हातूंतल्यान कायद्याची पदवी घेतली. ते उपरांत 1987 त तांणी नागपूरांत वकिली सुरू केली. त्या वेळार तांणी जिल्हो न्यायालया सयत मुंबय उच्च न्यायालयाच्या नागपूर खंडपिठांत खूबशा प्रकरणांनी युक्तीवाद केलो. ते उपरांत न्या. देशपांडे हांची 1996 त नागरी न्यायाधीश वरिश्ठ विभागांत गोंयांत नेमणूक जाली. 2002 त तांकां अतिरिक्त जिल्हो न्यायाधीश म्हूण बडटी मेळ्ळी. 7 एप्रील 2014 ह्या दिसा प्रधान जिल्हो आनी सत्र न्यायाधीश पदाचेर बडटी जाली. सध्या ते उत्तर गोंय जिल्हो प्रधान न्यायाधीश म्हूण सेवा करतात. कांय काळ तांणी दक्षीण गोंय जिल्हो प्रधान न्यायाधीश म्हूण सेवा दिल्या. ते भायर ते एक उत्कृश्ट खेळगडे. नागपूर विद्यापिठा वतीन तीन खेपे बास्केटबॉल सर्तींत तांणी प्रतिनिधीत्व केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
