भांगरभूंय | प्रतिनिधी
बांदकाम खात्यांत अभियंत्यांचे भरती खातीर परतून परिक्षा
भांगरभूंय I प्रतिनिधी
पणजी : भौशीक बांदकाम खात्यांत कनिश्ठ अभियंते आनी तंत्रीक सहाय्यक पदां खातीर परतून परिक्षा घेवपाची परवानगी दक्षता खात्यान दिल्या. पयलीं अर्ज केल्ल्यांकूय परतून परिक्षा दिवपाची संद मेळटली, अशें पीडब्ल्यूडी मंत्री निलेश काब्राल हांणी बुधवारा विधानसभेंत सांगलें.
प्रस्नोत्तराच्या वराक आमदार विजय सरदेसाय हांणी 2021त कनिश्ठ अभियंते आनी तंत्रीक सहाय्यक अशा 368 पदांचे भरती विशीं प्रस्न उपस्थीत केलो. हे भरते प्रक्रिये वेळार 70 कोटींचो भ्रश्टाचार जाला. ताका लागून ह्या प्रकरणाच्या चवकशे खातीर सभाघर समिती स्थापन करपाची आनी भ्रश्टाचारांत आस्पाव आशिल्ल्यांचेर सरकार कितें कारवाय करतले हाची म्हायती सभाघरा मुखार दिवपाची मागणी केली.
विरोधी पक्षफुडारी युरी आलेमांव हांचे सयत हेर सगल्याच विरोधी आमदारांनीय हाचे वयल्यान सरकाराचेर आरोप करपाक सुरवात केली. भौशीक बांंदकाम खात्यांतले अभियंंत्यांंचे भरती प्रक्रियेंत भानगड जाल्ल्याचो आरोप करीत विरोधकांनी सभाघर समिती स्थापन करपाची मागणी केली. ही मागणी न्हयकारतना भरती खातीर परतून परिक्षा घेवपाची घोशणा निलेश काब्राल हांणी केली.
पीडब्ल्यूडींत 2021त जाल्ले नोकरभरतीची दक्षता खात्या कडल्यान चवकशी सुरू आसा.
सध्या खात्याक सुमार 450 कर्मचाऱ्यांची गरज आसा. फावोशें कर्मचारी नाशिल्ल्यान कामां आडखळून उरल्यात. ताका लागून परतून परिक्षा घेवन कर्मचारी भरती करपाची मागणी आपूण दक्षता खात्या कडेन केल्ली.
आपल्या मागणे प्रमाण, दक्षता खात्यान परतून परिक्षा घेवपाची मेकळीक दिल्या.
दक्षता खात्याचो अहवाल आयले उपरांत तो सभाघरा मुखार दवरतले.
परिक्षा पीडब्ल्यूडीच्या एजन्सी वरवींच
अभियंते आनी तंत्रीक सहाय्यक पदांची परिक्षा अभियांत्रीकी म्हाविद्यालया कडेन दिवची न्हय. तशें जाल्यार तातूंत परतून घोळ जावपाक शकता. ही परिक्षा गोंय लोकसेवा आयोग (जीपीएससी) वा कर्मचारी भरती आयोगा वरवींच घेवपाची मागणी आमदार सरदेसाय हांणी मुख्यमंत्री डॉ. प्रमोद सावंत आनी मंत्री निलेश काब्राल हांचे कडेन केली. पूण काब्राल हांणी ही मागणी भायरावन पीडब्ल्यूडीचे एजन्सी वरवींच परिक्षा घेतले, अशें स्पश्ट केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
